საარჩევნო სისტემა – ოპოზიცია ახალ შეთავაზებას ამზადებს, წინასწარი განცხადებებით კი, ხელისუფლება დათმობაზე წასვლას არ გეგმავს

როგორი უნდა იყოს საარჩევნო სისტემა 2020 წლის საპარლამენტო არჩევნებისთვის. ოპოზიცია ხელისუფლებასთან მოლაპარაკების მეხუთე რაუნდისთვის ემზადება და გეგმავს ახალი მოდელის შეთავაზებას.

ოპოზიცია ცდილობს, პროპორციულ საარჩევნო სისტემათან მაქსიმალურად მიახლოებული მოდელი შესთავაზოს “ქართულ ოცნებას”, რომელიც გულისხმობს პარლამენტში 130 პროპორციული სიით, ხოლო 20 ან 15 მაჟორიტარი შევიდეს. 

“130/20-ზე თუ 135/15-ზე თუ მსგავსი კონფიგურაციები არის აქტიური განხილვის ფაზაში ოპოზიციაში. ჩვენ გვაქვს ასევე გეგმა იმ შემთხვევისთვისაც, თუკი ხელისუფლება არსებულ სისტემას დატოვებს, ეს არის ოპოზიციური კოორდინაცია მაჟორიტარების ირგვლივ და ამ შემთხვევაში ხელისუფლების დამარცხება აბსოლუტურად რეალისტურია”, — თქვა ოთო კახიძემ აჭარის საზოგადოებრივ მაუწყებელთან. 

გუშინ, ირაკლი კობახიძემ კი განაცხადა, რომ მათი კომპრომისული შეთავაზების მიღმა, რომელიც 100 პროპორციული სიით, ხოლო 50 მაჟორიტარი უნდა შევიდეს პარლამენტში ყველაზე მისაღებია, რადგან ამაზე მეტად მაჟორიტარების შემცირება, კანონპროექტის ჩავარდნას გამოიწვევს.  

დღეს კი, მაჟორიტარმა დიმიტრი ხუნდაძემ, რომელიც ე.წ. ამბოხებულ მაჟორიტარებს მიეკუთვნება განაცხადა, რომ თუკი მმართველი გუნდი ოპოზიციას თამაშში აყვება და 100/50-ზე მეტ კომპრომისზე წავა, მაჟორიტარები ისევ “მუხრუჭს გამოიყენებენ”. ხუნდაძის თქმით, 100/50-ზე შეთავაზება არის ის უკიდურესი კომპრომისი, “რომლის იქეთაც გარდაუვალი კრიზისია”.

ajaratv.ge