“რუსული კანონის” მოწინააღმდეგეები პარლამენტთან შეკრებას დღეს, 10:00 საათზე გეგმავენ

“უცხოურო გავლენის გამჭვირვალობის შესახებ” კანონპროექტის მოწინააღმდეგეები დღეს, 10:00 საათზე , პარლამენტთან შეიკრიბებიან.

როგორც საკანონმდებლო ორგანოსთან დამონტაჟებული სცენიდან ერთ-ერთმა სტუდენტმა განაცხადა, 10:00 საათიდან, თბილისის სხვადასხვა უნივერსიტეტის სტუდენტები, უნივერსიტეტებიდან საკანონმდებლო ორგანომდე მსვლელობით მივლენ და პარლამენტის შენობას წრეს შემოარტყამენ.

“10:00 საათიდან ყველა უნივერსიტეტიდან დაიძვრება მსვლელობა. ჩვენ ვნახავთ რეალურ სტუდენტურ ძალას. პარლამენტი 10:00 საათიდან იქნება პროტესტის ძლიერი კერა. ჩვენ ჩვენ ხმას გავაგონებთ დეპუტატებს, იქნებ რამე შეიგნონ და მესამე მოსმენით არ მიიღონ კანონპროექტი. ამიტომ , აქ ვიქნებით ძალია ბევრი და აუცილებლად გავაწვევინებთ უკან “რუსულ ოცნებას”,- განაცხადა სტუდენტმა, დავით სეხნიაშვილმა.

„ქართული ოცნების“ უმრავლესობა „უცხოური გავლენის გამჭვირვალობის შესახებ“ კანონპროექტის მესამე მოსმენით განხილვას და კენჭისყრით დამტკიცებას 14 მაისის პლენარულ სხდომაზე გეგმავს.