რუსეთი აცხადებს, რომ ცეცხლს შეწყვეტს, რათა უკრაინის რამდენიმე ქალაქიდან ევაკუაცია დაიწყოს

რუსეთმა დღეს კიდევ ერთხელ გამოაცხადა ჰუმანიტარული მიზნით ცეცხლის შეწყვეტა, რათა მშვიდობიანმა მოქალაქეებმა რამდენიმე ქალაქიდან ევაკუაცია შეძლონ.

ჰუმანიტარული დერეფნები კვლავ მოეწყობა კიევის, ჩერნიგოვის, სუმის, ხარკოვისა და მარიუპოლის მიმართულებით ადგილობრივი დროით 10:00 საათზე [07:00 GMT]. მოსკოვმა უკვე მესამედ გამოაცხადა ცეცხლის შეწყვეტის შესახებ, თუმცა უმეტესობა ჩაიშალა.

გუშინ უკრაინის ოფიციალურმა პირებმა განაცხადეს, რომ მათ მოახერხეს ქალაქ სუმიდან 5 000 ადამიანის ევაკუაცია. პროცესი დღეს დილითაც გაგრძელდება. სუმი რამდენიმე დღეა რუსეთის სასტიკი დაბომბვის ქვეშ იმყოფება. ადგილობრივი ოფიციალური პირების თქმით, მხოლოდ ორშაბათს 22 ადამიანი, მათ შორის 3 ბავშვი დაიღუპა რუსული საჰაერო თავდასხმების შედეგად. მათივე ცნობით, ევაკუაციის მცდელობა ჩაიშალა გუშინ ჩერნიგოვში, რადგან რუსეთი განაგრძობდა გასასვლელი მარშრუტის დაბომბვას.

გაეროს მონაცემებით, უკრაინიდან ლტოლვილთა რაოდენობამ უკვე 2 მილიონს გადააჭარბა.