რუსეთი ამერიკულ სატელიტებზე დარტყმით იმუქრება, თუ ისინი უკრაინას დაეხმარებიან

ამის შესახებ ინფორმაციას რუსული პროპაგანდისტული მედია ავრცელებს.

სავარაუდოდ, საუბარია აშშ-ს იმ თანამგზავრებზე, რომლებიც ომის დაწყების შემდეგ უკრაინას გადაეცა და მათი სამხედროების სასიცოცხლოდ აუცილებელი კომუნიკაციის წყარო გახდა.

• მიუხედავად იმისა, რომ რუსეთი თავს ესხმის და ანადგურებს ინტერნეტ კავშირებს, დასავლური სატელიტები მათ უწყვეტი კომუნიკაციის საშუალებას აძლევს.

ოკუპანტი ქვეყნის საგარეო საქმეთა სამინისტროს წარმომადგენლის, კონსტანტინ ვორონცოვის განცხადებით, რუსეთი დასავლურ კომერციულ სატელიტებს იმ შემთხვევაში დაარტყამს, თუკი ისინი უკრაინის დახმარებას გააგრძელებენ.

• “ცალკე გვინდა, ხაზი გავუსვათ უკიდურესად საშიშ ტენდენციას, რომელიც აშკარად გამოიხატა უკრაინაში განვითარებული მოვლენებისას. საუბარია შეერთებული შტატებისა და მისი მოკავშირეების მიერ სამოქალაქო ინფრასტრუქტურის კომპონენტების გამოყენებაზე კოსმოსში”.
• “კვაზი სამოქალაქო ინფრასტრუქტურა, შესაძლოა, საპასუხო დარტყმის კანონიერი სამიზნე გახდეს”, — განაცხადა ვორონცოვმა.
• მისი თქმით, რუსეთის მიზანი “კოსმოსური საქმიანობის სტაბილურობაა”