როცა ხელისუფლებას არ აქვს აზარტი

აზარტული თამაშების წინააღმდეგ არც 10 000 ხელმოწერას და არც არაერთგზის საკანონმდებლო ინიციატივებს ხელისუფლებისგან პასუხი ჯერ არ აქვს.

სულ ბოლოს აზარტული თამაშების წინააღმდეგ პეტიცია ანა დოლიძემ 2019 წლის 4 ნოემბერს დაარეგისტრირა და მალევე პროცედურის დასაწყებად საკმარისი მხარდაჭერა – 10 000 ხელმოწერა დააგროვა. თუმცა, პეტიციის მოთხოვნის შესრულებასთან დაკავშირებით ინფორმაცია ამ დრომდე ცნობილი არაა.

ინფორმაციის მისაღებად, ანა დოლიძემ და აზარტული თამაშების წინააღმდეგ კამპანიის წარმომადგენლებმა დღეს სახელმწიფო მთავრობის ადმინისტრაციას წერილით მიმართეს.

მანამდე პარლამენტარმა ლევან გოგიჩაიშვილმა საკანონმდებლო ინიციატივა აზარტული თამაშების რეგულირების შესახებ ორჯერ დაარეგისტრირა. კანონპროექტს რამდენიმე მიზანი ჰქონდა, მათ შორის: აიკრძალოს აზარტული თამაშობების რეკლამა რელიგიურ, საბავშვო, სასწავლო და სამედიცინო დაწესებულებებში, კულტურისა და სპორტის ორგანიზაციებში. პარლამენტმა გოგიჩაიშვილი მიერ წარდგენილი თითქმის იმავე შინაარსის კანონპროექტი ერთხელ უკვე “ჩააგდო”.

საქართველოს კანონმდებლობა აზარტული თამაშების რეკლამირებას არ კრძალავს. თუმცა, ბოლო დროს აზარტდამოკიდებულ ადამიანთა მიერ სუიციდის გახშირებული მცდელობების გამო, რამდნიმე მაუწყებელმა უარი განაცხადა აზარტული თამაშების რეკლამირებაზე. მათგან განსხვავებით აზარტული თამაშების რეკლამას ვხვდებით სახელმწიფოს დაქვემდებარებაში არსებულ ობიექტებზე, მაგალითად მუნიციპალურ ტრანსპორტზე. ამგვარი სახის გარე რეკლამების აკრძალვაზე პასუხს ანა დოლიძის პეტიციაც ელის.

თემასთან დაკავშირებით რეგიონულ მაუწყებელთა ალიანსი მთავრობის ადმინისტრაციას დაუკავშირდა ისინი კომენტარის გაკეთებას დაგვპირდნენ, თუმცა ახლა ჩვენს ზარებს არ პასუხობენ.