ოზურგეთში არასრულწლოვანი დაჭრეს. 16 წლის მოზარდი, რომელიც ყელშია დაჭრილი, ქუთაისში მართვით სუნთქვაზე იმყოფება.
შემთხვევა გუშინ დღის მეორე ნახევარში, სოფელ ოზურგეთში მოხდა. ორი მეგობარი, არასრულწლოვანი დ.ჯ. და 20 წლის გ.ხ. ამ უკანასკნელის კუთვნილ ავტოფარეხში მოტოციკლს არემონტებდნენ, როდესაც ერთ-ერთმა მათგანს პნევმატური იარაღი გაუვარდა. შემთხვევის შედეგად არასრულწლოვანი ყელის არეში დაიჭრა.
”ჩემი შვილიშვილი და ის ბიჭი მთელი დღე ჩხირკედალაობდნენ გარაჟში, ორივეს მოტოციკლი ჰყავს და მეგობრობენ. უცებ გამოვიდნენ და მითხრეს, ქალაქში უნდა წავიდეთო, სტუმარ ბიჭს ყელზე ხელი ჰქონდა მიდებული. ჩემმა შვილიშვილმა უცებ ტანსაცმელი გამოიცვალა, დასხდნენ მოტოციკლზე და წავიდნენ. მოტოციკლის საჭესთან სწორედ ეს ბიჭი დაჯდა. მეც ჩავთვალე, რომ მაღაზიაში რამის ყიდვა უნდოდათ, თორემ იარაღის ხმა არ გამიგია. ” – განაცხადა შემთხვევაში იდენტიფიცირებული პირის გ.ხ.-ს ბებიამ.
გ.ხ. ამჟამად პოლიციაში გამოკითხვაზე იმყოფება.
როგორც კლინიკა ”მედალფაში” ამბობენ, დაჭრილი კლინიკაში საკუთარი მოტოციკლით მივიდა და განაცხადა, რომ მოტოციკლით გადაადგილებისას, ყელში მოულოდნელად უცხო სხეულის მოხვედრა იგრძნო.
” ყელის მარჯვენა მხარეს ჰქონდა ჭრილობა, დაახლოებით 3-4 სანტიმეტრის სიღრმის. რენდგენოლოგიური და კომპიუტერული კვლევებით ყელსა და ტრაქეაში საფანტი იქნა აღმოჩენილი. ჭრილობა ძლიერ სისხლმდენი იყო.პაციენტი სუნთქვის უკმარისობას უჩიოდა და გადაყვანილ იქნა მართვით სუნთქვზე, ხოლო შემდეგ მკურნალობის გასაგრძელებლად გადაყვანილ იქნა ქუთაისის პროფილურ კლინიკაში.” – განაცხადა კლინიკა ”მედალფას” დირექტორმა დავით მდინარაძემ.
მოზარდს ქუთაისში ოპერაცია ჩაუტარდა და მისი მდგომარეობა ამჯამად სტაბილურად მძიმეა.
როგორც შინაგან საქმეთა სამინისტროში ამბობენ, საქმეზე დაკავებული არავინაა, თუმცა გამოვლენილია შემთხვევაში იდენტიფიცირებელი პირი და ამჯამად მიმდინარეობს გამოკითხვები.საქმეს შინაგან საქმეთა სამინისტრო 118-ე მუხლით იძიებს.
Loading ...
