რომელ ქვეყანაში მოიხმარენ ყველაზე მეტ შოკოლადს?

შოკოლადი მსოფლიოში ერთ-ერთი ყველაზე საყვარელი ტკბილეულია, რომელიც, ერთი შეხედვით, ყველა ქვეყანაში პოპულარულია. სინამდვილეში, ამ პროდუქტს ყველაზე დიდი რაოდენობით ევროპაში მოიხმარენ, სადაც ცივი კლიმატი და შოკოლადის წარმოების ხანგრძლივი ტრადიცია მოთხოვნას ზრდის.

მაგრამ რას ნიშნავს რეალურად, როდესაც ვამბობთ, რომ ქვეყანა “ყველაზე მეტ შოკოლადს ჭამს”? და როგორ უნდა გაიზომოს ისეთი ფართოდ მოხმარებადი და მრავალფეროვნად გადამუშავებული პროდუქტი, როგორიც შოკოლადია?

ამ კითხვაზე პასუხის გასაცემად, StatInvestor-ის მონაცემებს ვეყრდნობით, რომელიც ქვეყნების მიხედვით შოკოლადის მოხმარების კუთხით ერთ-ერთ ყველაზე ზუსტ ბაზას წარმოადგენს.

რეიტინგი ეფუძნება წლიურ მოხმარებას, რომელიც გამოხატულია ერთ სულ მოსახლეზე კილოგრამებში.

მონაცემები ითვლის ქვეყნის შოკოლადის მთლიან მარაგს (ადგილობრივ წარმოებას დამატებული იმპორტი), რომელსაც აკლდება ექსპორტი და ინდუსტრიული მოხმარება, რათა დადგინდეს უშუალოდ მოხმარებისთვის ხელმისაწვდომი რაოდენობა. მიღებული ციფრი იყოფა მოსახლეობის რაოდენობაზე, რითაც საშუალო ინდივიდუალური მოხმარება დგინდება.

რომელ ქვეყნებში მიირთმევენ ყველაზე მეტ შოკოლადს?
ერთ სულ მოსახლეზე

1. შვეიცარია – 8.8 კგ

გასაკვირი არ არის, რომ ქვეყანა, რომელმაც რძიანი შოკოლადი გვაჩუქა, სიის სათავეშია. შვეიცარიული ბრენდები, როგორიცაა Lindt, Toblerone და Läderach, ეროვნული სიმბოლოებია, შოკოლადი კი როგორც საექსპორტო, ისე ყოველდღიური მოხმარების აუცილებელ პროდუქტად ითვლება.

2. ავსტრია – 8.1 კგ

კაფეების ძლიერი კულტურითა და ისეთი რეგიონალური ტკბილეულით, როგორიცაა Mozartkugeln, ავსტრიელები შოკოლადს, განსაკუთრებით დესერტის ფორმით, დიდი სერიოზულობით ეკიდებიან.

3. გერმანია – 7.9 კგ

როგორც ევროპაში შოკოლადის ერთ-ერთი უდიდესი მწარმოებელი და მომხმარებელი, გერმანიის სიყვარული ტკბილეულისადმი ეფექტიანი შიდა ინდუსტრიითაა გამყარებული.

4. ირლანდია – 7.9 კგ

ირლანდიურ ოჯახებში შოკოლადი ძირითადი პროდუქტია, როგორც ფილების სახით, ასევე ცხობისთვის. ადგილობრივი ბრენდები დიდი ბრიტანეთიდან და კონტინენტური ევროპიდან იმპორტირებულ პროდუქციასთან ერთად პოპულარობით სარგებლობს.

5. გაერთიანებული სამეფო – 7.6 კგ

შოკოლადის ბაზარი ბრიტანეთში მრავალფეროვანია: მასობრივი წარმოების ფილები, სააღდგომო კვერცხები და სწრაფად მზარდი კრაფტ-შოკოლადის (ხელნაკეთი) ინდუსტრია. მხოლოდ Cadbury ეროვნული მოხმარების მნიშვნელოვან ნაწილს შეადგენს.

6. შვედეთი – 6.6 კგ

შვედეთში, რომელიც ცნობილია სიამოვნებისა და მინიმალიზმის ბალანსით, შოკოლადის მოხმარებას ხელს უწყობს როგორც ე.წ. ფიკას (fika – ყავის შესვენების) კულტურა, ისე სუპერმარკეტების ფართო ასორტიმენტი.

7. ესტონეთი – 6.5 კგ

ესტონეთის მოხვედრა ამ სიაში შესაძლოა სიურპრიზი იყოს. შოკოლადისადმი მათი მადა ასახავს წახემსების ძლიერ კულტურასა და პოსტსაბჭოთა პერიოდში ევროპული კვების ტრადიციების ათვისებას.

8. ნორვეგია – 5.8 კგ

მართალია, მეზობელ შვედეთს ჩამორჩება, მაგრამ ნორვეგიაში მოხმარებას მცირე, თუმცა ერთგული შიდა ბაზარი და გრძელი ზამთრის განმავლობაში შოკოლადის მიმართ განსაკუთრებული სიყვარული განაპირობებს.

9. პოლონეთი – 5.7 კგ

პოლონეთი ევროპაში შოკოლადის ერთ-ერთ ყველაზე სწრაფად მზარდ ბაზრად იქცა. ქვეყანას აქვს ძლიერი შიდა წარმოება და ერთ სულ მოსახლეზე მოხმარების მზარდი ტენდენცია.

10. ბელგია – 5.6 კგ

მიუხედავად იმისა, რომ ბელგია შოკოლადის მწარმოებელ ერთ-ერთ ყველაზე ცნობილ ქვეყანას წარმოადგენს, ის ათეულს ძლივს ხურავს. მისი პროდუქციის უდიდესი ნაწილი ექსპორტზე გადის, თუმცა ის, რაც ქვეყანაში რჩება, მსოფლიოში საუკეთესო ხარისხისაა.

ათეულის საპირისპიროდ, Statista-ს მონაცემებით, აზიის ქვეყნების მოსახლეობა ტკბილეულის მოთხოვნილების დასაკმაყოფილებლად სხვა სახის პროდუქტებს ანიჭებს უპირატესობას. შედეგად, მაგალითად, ინდოეთსა და ჩინეთში ერთ სულ მოსახლეზე მოხმარება გაცილებით დაბალია და, შესაბამისად, 0.3 და 0.1 კილოგრამს შეადგენს.

www.bm.ge