რომელმა პოლიტიკოსებმა დატოვეს ''ნაციონალური მოძრაობა''

“ერთიანი ნაციონალური მოძრაობის“ წევრებმა ზაზა ბიბილაშვილმა, მარიამ გერსამიამ და ნინო კალანდაძემ პარტია დატოვეს. ზაზა ბიბილაშვილი “2020NEWS”-თან  პარტიიდან წასვლის მიზეზებს განმარტავს და აცხადებს, რომ ამ გადაწყვეტილებაში ახალი არაფერია, რადგან ისინი პარტიულ საქმიანობას, დაახლოებით, ორი წელია, ჩამოშორდნენ.

ამასთან, როგორც ბიბილაშვილი სააგენტოსთან აღნიშნავს, ახლა მთელი ენერგია “ჭავჭავაძის ცენტრის“ განვითარებისა და სამომავლო მიზნების შესრულებისკენ არის მიმართული.

“რეალურად, ამ გადაწყვეტილებაში სიახლე არაფერია. მოგეხსენებათ, ჩვენ თითქმის ორი წელია პარტიულ საქმიანობაში აღარ ვმონაწილეობთ. მთლიანად ჩართულები ვართ “ჭავჭავაძის ცენტრის“ განვითარებაში, რომლის მიზნები და ხედვა ღირებულებითი და საგანმანათლებლო შინაარსისაა.

პარტიაში ჩვენი ფორმალური წევრობა სხვადასხვა ადამიანში ბევრ კითხვის ნიშანს აჩენდა, ამიტომ დე-ფაქტო მდგომარეობა ფორმალურ სტატუსთან შესაბამისობაში მოვიდა. ჩვენს მიერ მიღებულ გადაწყვეტილებაში არანაირი თვისობრივი და შინაარსობრივი სიახლე არ არის“, – განაცხადა ზაზა ბიბილაშვილმა.

მარიამ გერსამიაც “2020NEWS“-თან იგივეს აცხადებს, რომ პარტიიდან წამოსვლის გადაწყვეტილება უკავშირდება “ჭავჭავაძის ცენტრს“, რომელიც თანამოაზრეებთან, მათ შორის, ზაზა ბიბილაშვილთან და ნინო კალანდაძესთან ერთად დააფუძნა. 

“კარგა ხანია, რაც “ჭავჭავაძის ცენტრში“ ვმუშაობთ და ახალგაზრდების, სამოქალაქო საზოგადოების მხარდაჭერისა და გაძლიერების მიმართულებით ძალიან საინტერესო პროექტებს ვახორციელებთ. მიგვაჩნია, რომ დღეს საქართველოში პროდასავლური კურსის განვითარება ძალიან სასარგებლოა.

საზოგადოება, რომელიც ძალიან ნიჭიერი და პატრიოტი ახალგაზრდებით სავსეა, ისე უნდა გაძლიერდეს, რომ შემედეგ ამ და მომავალ ხელისუფლებასა და ამ და მომავალ ოპოზიციას, მათ შორის, პოლიტიკური დღისწესრიგი უკარნახოს. ვფიქრობთ, რომ შეგვიძლია, ამ მიმართულებით ძალიან აქტიურები ვიყოთ. ჩვენი ქვეყნისთვის ძალიან მნიშვნელოვანი ამოცანების შესრულებას ძალიან გრძელვადიან პერსპექტივაში “ჭავჭავაძის ცენტრის“ მომავალს ვუკავშირებით“,- განაცხადა მარიამ გერსამიამ.

ინფორმაციისთვის, “ერთიანი ნაციონალური მოძრაობის“ წევრებმა ზაზა ბიბილაშვილმა, მარიამ გერსამიამ და ნინო კალანდაძემ პარტიის დატოვებასთან დაკავშირებით განცხადება დღეს გაავრცელეს.