რომელი მედიკამენტების გამო დააჯარიმა კონკურენციის სააგენტომ 4 კომპანია ნახევარი მლნ ლარით

კონკურენციისა და მომხმარებლის დაცვის სააგენტოს (GCCA) ინფორმაციით, ოთხი ფარმაცევტული კომპანია დომინანტური მდგომარეობის ბოროტად გამოყენებისთვის ჯამში 560 ათასი ლარით დააჯარიმეს.

სააგენტოს ცნობით, კომპანიები შემდეგი მედიკამენტების მაღალი ფასნამატის გამო დაჯარიმდნენ:

• შპს გლობალ ცბს, მედიკამენტები – ოფლაბ-ოზი, ჰაიზინი, იორილი-10;
• შპს კონცეპტ ფარმა, მედიკამენტი – ფლოქაზოლი;
• შპს რიჩ გრუპი, მედიკამენტი – ზინასენი;
• შპს გეა – მედიკამენტები – ბისეპტოლი 120 მლ. ბისეპტოლი 480 მლ;

GCCA-მ მოკვლევა ჯანდაცვის სამინისტროს მიმართვის საფუძველზე 2023 წლის დეკემბერში დაიწყო. საკითხი ეხება – გარკვეული მედიკამენტების იმპორტიდან მომხმარებლამდე მაღალი ფასნამატების ფორმირებას.

სააგენტომ 4 კომპანიის შემთხვევაში დომინანტური მდგომარეობის ბოროტად გამოყენება დადგინდა, რაც მომხმარებლისთვის ჭარბი ფასის დაწესებაში გამოიხატა. ჭარბი ფასი განისაზღვრა როგორც გონივრულ მარჟაზე (30%) + ფასნამატი (20%-ზე მეტი). სააგენტოს განცხადებით, დამრღვევი კომპანიების მიერ მედიკამენტებზე დაწესებული ფასები გონივრულ დონეს მნიშვნელოვნად აღემატებოდა. შედეგად, 4 კომპანიის ჯარიმის მოცულობამ ჯამში 559 358 ლარი შეადგინა. საჯარიმო სანქციები განსაზღვრულია 2024 წლის ბრუნვის მაქსიმუმ 5%-მდე, ზიანთან კორელაციით.

დაჯარიმებულები არიან:

• შპს გლობალ ცბს – 249 144 ლარით;
• შპს კონცეპტ ფარმა, – 21 646 ლარით;
• შპს რიჩ გრუპი – 77 936 ლარით;
• შპს გეა -210 632 ლარით;

სააგენტოს ინფორმაციით, მოკვლევის პროცესში გამოვლინდა, რომ გარკვეული მედიკამენტების თვითღირებულებაში შეტანილი იყო ისეთი ხარჯები, რომლებიც უშუალოდ ფასწარმოქმნას არ უკავშირდება და შეიძლება მიანიშნებდეს ფასის ხელოვნურ ზრდას. კერძოდ, ძვირად ღირებული საჩუქრები (მათ შორის, ოქროს სამკაულები); კულტურულ ღონისძიებებზე, სპექტაკლებზე სტუმრების მოწვევა; არაფორმალურ გარემოში სხვადასხვა მხარეებთან შეხვედრები; ევროპასა და საქართველოში კონფერენციების და მაღალი კლასის სასტუმროებში განთავსების ხარჯები; კოსმეტოლოგიური და სტომატოლოგიური ხარჯები; ჯარიმებისა და კანონით გათვალისწინებული სანქციების ხარჯები; პრემიუმ კლასის ავტომობილების მომსახურება და სხვა.

GCCA-ს შეფასებით, მოკვლევა ეხება იმ პერიოდს, როდესაც რეფერენტული ფასები ჯერ არ იყო დაწესებული. სააგენტოში აცხადებენ, რომ დღევანდელი მდგომარეობით, რეფერენტული ფასების ამოქმედებამ მედიკამენტებზე არსებული მაღალი ფასნამატები მნიშვნელოვნად გაანეიტრალა.