რომელია ვირუსი, რომელიც ხშირად ენტეროვირუსში ერევათ – რა სიმპტომებით ხასიათდება ის

როტავირუსი ბავშვებში ძირითადად, სეზონებს შორის გარდამავალ ეტაპზე ვრცელდება. თითქმის ყველა მშობელს გამოუცდია ეს უსიამოვნო დაავადება, რომელსაც ნაწლავის გრიპსაც უწოდებენ. როტა ვირუსით გამოწვეული ავადობის დროს ზიანდება ბავშვის საჭმლის მომნელებელი ტრაქტი. მაგრამ შესაძლოა სასუნთქი სისტემაც იყოს ჩართული. როტავირუსი ადვილად შეიძლება ენტეროვირუსშიც აგერიოთ და ასეც ხდება ხოლმე ხშირად.

სხვათა შორის, როდესაც ვამბობთ “როტავირუსს”, ვგულისხმობთ მის გამომწვევ აგენტს. ორგანიზმში მისი შეღწევის ძირითადი გზა დაბინძურებული წყალი ან საკვებია, ასევე ჭუჭყიანი ხელები. მაგრამ ჰაერ-წვეთოვანი გზით გადაცემაც შესაძლებელია – როცა ინფიცირებული ადამიანი მიკრობებს ხველისა და ცემინების გზით ავრცელებს.

კუჭ-ნაწლავის ტრაქტში მოხვედრისას ვირუსები აქტიურად მრავლდება, რაც ნაწლავის ლორწოვანი გარსის ანთებას და ცნობილ სიმპტომებს იწვევს: ღებინებას, ფაღარათს, ტემპერატურას და ა.შ.

დაავადება სეზონურია, ცივ სეზონში, იმუნიტეტის დაქვეითების პერიოდში, უფრო ადვილად ვრცელდება. ვინაიდან როტავირუსის გავრცელება ხშირად გრიპის სეზონს ემთხვევა, დაავადებას არაფორმალურად “ნაწლავის გრიპი” უწოდეს. ზოგი ენტეროვირუსთანაც აიგივებს.

 

როტავირუსის ნიშნები:

დაავადება ჩვეულებრივ დიარეით და ღებინებით იწყება, რასაც ტემპერატურის მკვეთრი მატება მოჰყვება.

სიმპტომები შეიძლება განსხვავდებოდეს, მაგრამ არსებობს რამდენიმე საერთო ნიშანი.

• ქაფიანი, ყვითელი შეფერილობის, თხელი კონსისტენციის განავალი;
• ხშირი ღებინება (დღეში 5-ზე მეტი);
• ცხელება;
• მუცლის ძლიერი ტკივილი;
• სისუსტე;
• ფერმკრთალი და ცივი კანი;
• სურდო;
• ყელის ტკივილი.

 

ჯგუფური ინფიცირება

ბავშვები, რომლებიც საბავშვო ბაღებსა და სკოლებში დადიან, განსაკუთრებით მგრძნობიარენი არიან ამ დაავადების მიმართ. ჯგუფში მუდმივად კონტაქტობენ თანატოლებთან, ხელში ერთსა და იმავე სათამაშოებს და საკანცელარიო ნივთებს იღებენ და ამავდროულად, ხელებსაც დროულად არ იბანენ. თუ ჯგუფში ერთი ბავშვი ავადდება, მოკლე დროში ინფექცია სწრაფად ვრცელდება, ზოგადად ინფექციის ინკუბაციური პერიოდი 1-5 დღეა.

დაავადება ყველაზე მძიმედ 2 წლამდე ასაკის ბავშვებში ვლინდება, რადგან ისინი სწრაფად განიცდიან დეჰიდრატაციას. თუ ბავშვი უარს ამბობს სითხის მიღებაზე, ბალანსის შევსება მხოლოდ კლინიკაშია შესაძლებელია.

მოზრდილები, როგორც წესი, უფრო ადვილად იტანენ ინფექციას და უფრო სწრაფად გამოჯანმრთელდებიან (საშუალოდ, დაავადება გრძელდება 5-7 დღე). მაგრამ აქაც არის რისკის ჯგუფები: ადამიანები, რომლებსაც ნაწლავების დაზიანება ან იმუნიტეტის პრობლემები აქვთ, გართულებების რისკის წინაშე დგანან.

რა უნდა გააკეთოთ როტავირუსის დროს?

გამორიცხეთ ბავშვის რაციონიდან რძის და ფერმენტირებული რძის პროდუქტები, უმი ხილი და ბოსტნეული.

ბავშვმა შეიძლება უარი თქვას ჭამაზე, არ უნდა აიძულოთ, მაგრამ დაჟინებით უნდა შესთავაზოთ სითხე მცირე ყლუპებით, რაც შეიძლება ხშირად.

ყველაზე სწორი მიდგომა არა თვითმკურნალობა, არამედ ექიმთან კონსულტაციაა.

 

პრევენცია და მკურნალობა

როტავირუსული ინფექციის დიაგნოზს პედიატრი, გასტროენტეროლოგი ან ინფექციონისტი სვამს. გამოკვლევისა და ისტორიის აღების შემდეგ სპეციალისტს შეუძლია დამატებითი კვლევები დანიშნოს, მათ შორის სისხლის საერთო, განავლის ანალიზი და სხვა.

დაავადების მკურნალობა ჩვეულებრივ სიმპტომურ მკურნალობას მოიცავს, რისთვისაც მედიკამენტები და დიეტა ინიშნება. თერაპიის მთავარი მიზანი ინტოქსიკაციისა და დეჰიდრატაციის წინააღმდეგ ბრძოლაა.

კვება

ავადმყოფი ბავშვის მენიუში მსუბუქი კერძები ჩართეთ, რომლებიც არ გააღიზიანებს ლორწოვან გარსს. ეს შეიძლება იყოს ბრინჯის ან წიწიბურის წყალზე მომზადებული ფაფა, კარტოფილის ან/და სტაფილოს პიურე, თევზის, ფრინველის ან ხორცის კერძები, რომლებიც მოხარშული, მოთუშული ან ორთქლზე მომზადებულია.

როტავირუსის ინფექციის თავიდან ასაცილებლად რეკომენდებულია ჰიგიენის მარტივი წესების დაცვა. ამ ინფექციის წინააღმდეგ აცრაც შესაძლებელია.