როდის დასრულდება ომი უკრაინაში – არესტოვიჩის პროგნოზი

უკრაინის პრეზიდენტის ოფისის ხელმძღვანელის მრჩევლის, ოლექსი არესტოვიჩის პროგნოზით, უკრაინაში ომი შესაძლოა, „საკმაოდ გრძელი ამბავი“ იყოს და გაგრძელდეს მომავალი წლის ზაფხულამდე, თუ საუბარი სრულ დეოკუპაციაზეა, ამის შესახებ მან ჟურნალისტ დმიტრი გორდონთან ინტერვიუში ისაუბრა.

მისივე მტკიცებით, რუსეთს მოლაპარაკების დაწყება სურს და დაინტერესებულია, რაც შეიძლება მალე ჩართოს ამაში უკრაინა.

„საუბარია არაა კაპიტულაციაზე, კაპიტულაციაზე მარტშიც არ იყო ლაპარაკი, მათ ნეიტრალური სტატუსი სურთ (არ შევიდეთ ნატოში), მყარად სურთ ყირიმი და დონბასი. მზად არიან, ხერსონი დათმონ, 100 %-ით ვარ დარწმუნებული და სანქციების მოხსნაც ძალიან უნდათ“, – განაცხადა არესტოვიჩმა, რომელმაც დაამატა, რომ ამაზე უკრაინის მოქმედი პრეზიდენტი არასდროს დათანხმდება.

არესტოვიჩს ხშირად ეკითხებიან ომის დასრულების ვადებზე. მისი პროგნოზი ცვალებადია – ივნისში ის ვარაუდობდა, რომ ომი 2.5 წელს გაგრძელდება, მაისში ამბობდა, რომ რამდენიმე თვეში დასრულდება. პროგნოზების გაუმართლებლობის მიზეზად არესტოვიჩი „რუსეთის პოლიტიკური ხელისუფლების იდიოტიზმს“ ასახელებს.