როდის დაიწყება ანაკლიის პორტის მშენებლობა? – მინისტრის განმარტება

ეკონომიკის მინისტრის ლევან დავითაშვილის განცხადებით, მალე გახდება ცნობილი თუ ვინ იქნება სახელმწიფოს კერძო პარტნიორი ანაკლიის ღრმაწყლოვანი პორტის პროექტში.

პარლამენტში ინტერპელაციის წესით გამოსვლისას მინისტრმა აღნიშნა, რომ გამარჯვებულის გამოვლენიდან 9 თვეში კომპანია ანაკლიაში სამუშაოების დაწყებას შეძლებს.

„ჩვენ გათვალისწინებული გვაქვს, რომ მშენებლობის დაწყებიდან დაახლოებით 3 წელი იქნება საჭირო, რომ პირველი ფაზა დასრულდეს.

ვფიქრობთ, რომ მშენებლის შერჩევიდან 9 თვის განმავლობაში ყველა მოსამზადებელი სამუშაო დასრულდება და იურიდიულად მზად იქნება მშენებელი კომპანია, რომ სამუშაოებს შეუდგეს“,- აღნიშნა ლევან დავითაშვილმა.

ეკონომიკის მინისტრის განცხადებით, ანაკლიის პორტის კერძო პარტნიორის შერჩევის მეორე ეტაპზე გადასული ორი კომპანიიდან, ერთი ჩინურ-სინგაპურული კონსორციუმი, მეორე კი შვეიცარიულ-ლუქსემბურგული კომპანიაა.

ინფორმაციისთვის, მთავრობის გადაწყვეტილებით, ანაკლიის ღრმაწყლოვანი პორტი სახელმწიფოს თანამონაწილეობით აშენდება და 51%-ის მფლობელი სწორედ სახელმწიფო იქნება, ხოლო 49% კერძო პარტნიორის მფლობელობაში გადავა.

ანაკლიის ღრმაწყლოვანი ნავსადგურის ასაშენებლად ინტერესთა გამოხატვა თებერვალში გამოცხადდა. ივნისის ბოლოს ეკონომიკის მინისტრმა ლევან დავითაშვილმა განაცხადა, რომ ნავსადგურის ასაშენებლად ინტერესთა გამოხატვა დასრულდა.

მთავრობამ „ანაკლიის განვითარების კონსორციუმთან“ გაფორმებული ხელშეკრულება 2020 წლის იანვარში გაწყვიტა. პროექტის შეჩერების შემდეგ, ინვესტორმა კომპანიამ საქართველოს წინააღმდეგ ორი საარბიტრაჟო დავა დაიწყო.