როდის დაინერგება საქართველოში ე.წ. “მწვანე პასპორტი” და რა შეიცვლება მისი ამოქმედებით

ჯანდაცვის მინისტრის მოადგილე თამარ გაბუნია აცხადებს, რომ უწყებათაშორისი საკოორდინაციო საბჭოს დღევანდელ სხდომაზე საუბარი „მწვანე საშვის“ კონცეფციასაც.

მისივე თქმით, „მწვანე საშვის“ კონცეფცია სამი კომპონენტიდან ერთ-ერთის არსებობას გულისხმობს.

„რაც შეეხება „მწვანე საშვის“ კონცეფციას, რომელიც არის გარკვეულწილად არაპირდაპირი რეგულირება და სავალდებულო მოთხოვნა, რომელიმე ერთი პარამეტრის, რაც აღწერს პირის ეპიდუსაფრთხოების სტატუსს. ეს არის ვაქცინაცია, ანტიგენ ტესტირება ყოველდღიურ რეჟიმში ან პისიარ ტესტირება 72-საათიან რეჟიმში და ასევე, გადატანილი ინფექცია 14 დღიდან ექვსი თვის ინტერვალში. ამ სამი პარამეტრიდან ერთ-ერთი ნიშნავს, რომ პირი შეიძლება, უსაფრთხოდ ჩაერთოს ბიზნეს ან სოციალურ აქტივობებში და ბევრი ქვეყანა ამას უკვე იყენებს“, – განაცხადა თამარ გაბუნიამ.

მისი თქმით, „მწვანე საშვის“ ამოქმედებამდე საჭიროა ადმინისტრირების მექანიზმების მომზადება.

„ადმინისტრირების ნაწილში მნიშვნელოვანია, რომ ვიდრე მოხდება ამ მექანიზმის აღიარება და სავალდებულო სახით ქვეყანაში დანერგვა, საუბარი მაქვს მწვანე საშვის მექანიზმზე, ასევე მნიშვნელოვანია ყველა პირობა იყოს შექმნილი, რომ აღსრულების ნაწილში არ შეიქმნას შეფერხებები და ამან არ გამოიწვიოს გარკვეული სახით ფალსიფიცირება, გაყალბება სერტიფიკატის ნაწილში და მეორე, დარღვევა წესის, რომელსაც ჩვენ დავაწესებთ. ამდენად, ვიდრე ბიზნესი თავად მზაობას არ გამოხატავს იმასთან დაკავშირებით, რომ ყველა მომხმარებელი, რომელიც მასთან მივა „მწვანე საშვის“ გარეშე, ვერაფრით მოხვდება იმ გარემოში, რომელშიც ბიზნესაქტივობა წარმოებს და ასევე, არ იქნება ზედმიწევნით ზუსტად შრომის ინსპექციის მხრიდან ის მექანიზმები და გარანტიები, რომლებიც მოგვცემს საშუალებას, რომ აღსრულება მოხდეს შესაფერისად, მანამდე ნებისმიერ შემთხვევაში ეს იქნება მხოლოდ ფორმალობა. ამდენად ამ გარანტიებზე მიდის ახლა მუშაობა და როგორც კი გვექნება საბოლოოდ ჩამოყალიბებული სურათი, რა თქმა უნდა, ეს გადაწყვეტილება არ დააყოვნებს“, – აღნიშნა თამარ გაბუნიამ.

თამარ გაბუნიას განცხადებით, ე.წ. მწვანე პასპორტის მექანიზმის დანერგვის შემთხვევაში, ყველა ის რეგულაცია, რომელიც კოვიდის მართვისთვის დაწესებულია, ძალაში დარჩება.

„ჩვენთვის ყველასთვის მნიშვნელოვანია, რომ ვაქცინაციის პროგრამაში მომართვიანობა გაიზარდოს.

ამრიგად, ჩვენ ვსაუბრობთ, ე.წ. მწვანე საშვის, მწვანე პასპორტის მექანიზმზე, რომელიც ითვალისწინებს გარკვეულწილად ეპიდუსაფრთხოებაზე დამატებით მოთხოვნებს, მათ შორის, ვაქცინაციაზეც მოთხოვნას. ეს რამდენად იქნება დადებითი სტიმული ვაქცინაციის ქცევისთვის, რთული სათქმელია. მწვანე პასპორტის შემთხვევაში, ყველა ის რეგულაცია, რომელიც დაწესებულია კოვიდის მართვისთვის, ძალაში რჩება. მწვანე პასპორტი ვერცერთ შემთხვევაში, ვერ ჩაანაცვლებს ვერცერთ რეგულაციას,“- განაცხადა გაბუნიამ.

ამასთან, მისივე თქმით, გარანტია, რომ საერთოდ გამორიცხულია დამატებითი შეზღუდვების დაწესებაზე საუბარი, არავის შეიძლება ჰქონდეს.

„მწვანე საშვის“ მექანიზმს არ ექნება დაუყოვნებელი შედეგი. „მწვანე საშვის“ მექანიზმი თუ ამოქმედდა, აქ, რა თქმა უნდა, გარკვეული პერიოდი უნდა მიეცეს როგორც მომხმარებელს, ასევე დასაქმებულსა და დამსაქმებელს მოსამზადებლად, იმისთვის, რომ თუ აქამდე არ მიუღიათ აცრის გადაწყვეტილება, აიცრან. „მწვანე საშვის“ მექანიზმი არ არის ერთადერთი მექანიზმი და არც მოლოდინი უნდა გვქონდეს, რომ როგორც კი მწვანე საშვის მექანიზმი ამოქმედდება, უეცრად ვაქცინაციის პროგრამა დაუბრუნდება დღეში 30 ათას აცრას. ეს არის ერთ-ერთი მექანიზმი, რომ დამატებითი სტიმული შეიქმნას იმ ადამიანებისთვის, ვინც აცრა ვერ გადაწყვიტა. ეს არის ერთ-ერთი და ერთადერთი საშუალება“, – განაცხადა გაბუნიამ.