როდის გაასაჯაროებს ჯანმო “სინოფარმისა” და “სინოვაკის” შეფასებას მომავალ

ჯანდაცვის მსოფლიო ორგანიზაციის სტრატეგიული საკონსულტაციო ექსპერტთა ჯგუფი (SAGE) ჯერ კიდევ მსჯელობს ჩინურ ვაქცინებთან, “სინოფარმსა” და “სინოვაკთან” დაკავშირებით, ამის შესახებ ჯანდაცვის მსოფლიო ორგანიზაციის დღევანდელ ბრიფინგზე განაცხადა მარიანჯელა სიმაომ, ჯანდაცვის მსოფლიო ორგანიზაციის გენერალური დირექტორის თანაშემწემ.

“შემდეგი კვირის დასაწყისში, ან შემდეგი კვირის ბოლოს სამი ვაქცინის შეფასება გასაჯაროვდება”, – აღნიშნა მარიანჯელა სიმაომ. საუბარია შემდეგ ვაქცინებზე – „სინოვაკზე“, „სინოფარმსა“ და „მოდერნაზე“.

ექსპერტთა ჯგუფი განიხილავს “სინოფარმის” ეფექტიანობას მწარმოებლის მიერ წარდგენილი კლინიკური ტესტების მიხედვით, ვაქცინის მოქმედებას უფროს ასაკობრივ ჯგუფებზე და ვაქცინის უსაფრთხოების მონაცემებს ტესტირების სამივე ფაზაში. ჯანმო ამ რეკომენდაციაზე დაყრდნობით გადაწყვეტს, მისცემს თუ არა საბოლოო ავტორიზაციას ორივე ვაქცინას.

სტრატეგიული საკონსულტაციო ექსპერტთა ჯგუფის თანახმად, 50 %-ზე მეტი ეფექტიანობა საკმარისია იმისთვის, რომ ვაქცინამ რეკომენდაცია მიიღოს. 70 % და მეტი, შესაბამისად, ვაქცინისთვის ითვლება კარგ მაჩვენებლად, წინასწარი ინფორმაციით, „სინოფარმი“ ამ მონაცემებს აკმაყოფილებს.

„სინოფარმის“ 30 დეკემბრის ოფიციალური განცხადებით, ვაქცინის გამოცდის სამმა ფაზამ აჩვენა, რომ ის 79 %-ით ეფექტიანია. არაბთა გაერთიანებულმა საამიროებმა, სადაც იანვრის დასაწყისში დაამტკიცეს „სინოფარმის“ ვაქცინა, განაცხადა, რომ ამ ეტაპზე ვაქცინამ 86 %-იანი ეფექტიანობა აჩვენა.

ჯანდაცვის მსოფლიო ორგანიზაციის ავტორიზაცია ნიშნავს, რომ ვაქცინა დამტკიცებულია საგანგებო გამოყენებისთვის (Emergnecy use listing). ამ გადაწყვეტილებამდე, ჯანდაცვის მსოფლიო ორგანიზაციის ექსპერტთა გუნდი სიღრმისეულად განიხილავს ვაქცინის მეორე და მესამე ფაზის ტესტირების შედეგებს. ავტორიზაცია მნიშნველოვნად აჩქარებს ვაქცინის იმპორტის პროცესს.

საქართველოში “სინოფარმით” აცრაზე რეგისტრაცია 27 აპრილიდან დაიწყო. ეს ერთადერთი ვაქცინაა, რომელიც 18-დან 55 წლამდე მოქალაქეებისთვის ხელმისაწვდომია. „სინოფარმის“ წარმოებული ვაქცინის 100 000 დოზა საქართველოში 3 აპრილს შემოვიდა. დაავადებათა კონტროლისა და საზოგადოებრივი ჯანდაცვის ცენტრის დირექტორის, ამირან გამყრელიძის თანახმად, „სინოფარმის“ დამატებით ნახევარ მილიონ დოზას ქვეყანა ივნის-ივლისში მიიღებს.

ამ ვაქცინას უკვე იყენებენ ევროპის, აზიისა და აფრიკის ქვეყნებში. „სინოფარმს“ „მკაცრი მარეგულირებლის” ავტორიზაცია უნგრეთმა მიანიჭა და ევროკავშირის პირველი ქვეყანა გახდა, რომელმაც მისი გამოყენება დაიწყო. ევროპაში ამ ვაქცინას სერბეთი და ჩრდილოეთი მაკედონიაც იყენებემ. „სინოფარმით“ ამჟამად ჯამში 45 ქვეყანაში იცრებიან.

“სინოვაკის” 100 000 დოზა, რომელიც ჩინეთმა საქართველოს საჩუქრად გადასცა, უკვე ჩამოვიდა. კლინიკური საბჭოს სხდომის დასრულების შემდეგ გამართულ ბრიფინგზე თამარ გაბუნიამ განმარტა, რომ „სინოვაკის“ გამოყენება დაიწყება მას შემდეგ, რაც ჯანმრთელობის მსოფლიო ორგანიზაცია მას ავტორიზაციას მიანიჭებს. „სინოვაკს“ ამჟამად 22 ქვეყანა იყენებს, მათ შორის – აზერბაიჯანი და უკრაინა.

პირველი მასშტაბური კლინიკური ტესტით, რომელიც ბრაზილიაში ჩატარდა, ვაქცინამ 50.65% ეფექტიანობა აჩვენა. ჩილის უნივერსიტეტის კვლევით, ამ ვაქცინის ორი დოზის გაკეთებიდან ორი კვირის შემდეგ, ეფექტიანობა 54%-ია. თურქეთის კლინიკურ ტესტებში ვაქცინის ეფექტიანობა 91.25% იყო. მონაცემებში ამხელა განსხვავება იმით აიხსნება, რომ ბრაზილიაში ეფექტიანობა ვირუსის სიმპტომატური და უსიმპტომო ვერსიების წინააღმდეგ გაიზომა, თურქეთში კი – მხოლოდ სიმპტომატურის.

„სინოვაკი“, ისივე როგორც „სინოფარმი“, ტრადიციული ხერხითაა დამზადებული. სხეულში შეყვანილი ვირუსის მკვდარი ნაწილიაკები დაავადებას არ იწვევს და ორგანიზმის იმუნურ სისტემას Сovid-19-ის საწინააღმდეგო ანტისხეულების გამომუშავებას ასწავლის. რამდენი თვის განმავლობაშია ეფექტიანი „სინოვაკით“ გამომუშავებული ანტისხეულები, ჯერჯერობით უცნობია, თუმცა ასეთი მონაცემები დაზუსტებით არც სხვა ვაქცინებზე გვაქვს.

„სინოფარმისა“ და „სინოვაკის“ საგანგებო გამოყენების ნებართვის მინიჭებების საკითხს ჯანდაცვის მსოფლიო ორგანიზაცია მაისის დასაწყისში გადაწყვეტს.

www.radiotavisupleba.ge