როდიდან შემოვა და რა ეღირება საქართველოში კომერციული ვაქცინა?

სადაზღვევო კომპანია „გლობალ ბენეფიტ ჯორჯიამ“ დაიწყო იმ ადამიანების აღწერა და რეგისტრაცია, ვინც მზად არის ნებაყოფლობით, კონკრეტული საფასურის გადახდის შემთხვევაში ვაქცინა გაიკეთოს. საუბარია კომპანიის მიერ დაზღვეულ მოქალაქეებზე, რომელთა რიცხვი საკმაოდ მაღალია.

კომპანიის სამეთვალყურეო საბჭოს წევრი, ნინა კობახიძე „საქმის კურსის“ ეთერში საუბრისას აცხადებს, რომ ყველა კომპანიის პასუხისმგებლობაა, დასაქმებულებისა და თავისი დაზღვეულების წინაშე, რომ ხელმისაწვდომი გახადოს ვაქცინა იმ შემთხვევაში, თუ საქართველოში კომერციულად დაიწყება ვაქცინის შემოტანა.

რაც შეეხება ვაქცინაციის საფასურს, ნინა კობახიძე ამბობს, რომ ჯერ ამაზე საუბარი ნაადრევია.

„ჯერ შემომტანებმა, კერძო მწარმოებლებმა უნდა მიიღონ ნებართვა სახელმწიფოსგან, სავარაუდოდ აპრილის ბოლოდან. რეგისტრაციის მიზანია, რომ სახელმწიფომ დაინახოს, ჩვენ აღვრიცხოთ რამდენი ადამიანია მზად ვაქცინაციისთვის“, – განაცხადა ნინა კობახიძემ.

კითხვაზე, შესაძლოა თუ არა ვაქცინაციის ღირებულება 250-300 ლარამდე იყოს, პასუხისგან ნინა კობახიძე თავს იკავებს.

„ფასწარმოქმნაზე საუბარი ნაადრევია. არ ვიცით როდის დაიწყება ვაქცინაცია და თუ დაიწყება როგორ“, – განაცხადა მან და დასძინა, რომ გაუგებარია, თუ რამ შეიძლება შეუშალოს ხელი ვაქცინის შეძენას.

„1 მაისიდან იმდენად ხელმისაწვდომი ხდება ამერიკაში ვაქცინა, რომ ვხუმრობ ხოლმე – „ამაზონიდან“ შევძლებთ გამოწერას-თქო. ამიტომ გაუგებარია, რატომ შეიძლება ხელი შეგვეშალოს, თუნდაც კერძოდ ამის შეძენაში. რეალურად მიმაჩნია, რომ აპრილის ბოლოს, მაისში, ადამიანების დიდი მოცულობისთვის ვაქცინა ხელმისაწვდომი იქნება“, – ამბობს კობახიძე.

www.bm.ge