როდიდან ამოქმედდება საქალაქთაშორისო მგზავრთა გადაყვანის ახალი რეგულაციები – სახმელეთო ტრანსპორტის სააგენტო ინფორმაციას ავრცელებს

საქართველოს ეკონომიკისა და მდგრადი განვითარების სამინისტროს სსიპ სახმელეთო ტრანსპორტის სააგენტო საქალაქთაშორისო მგზავრთა გადაყვანის რეგულაციაში ცვლილებების შესახებ ინფორმაციას ავრცელებს.

უწყების ცნობით, სახმელეთო ტრანსპორტის სააგენტოს ინიციატივით, ცვლილებები შედის საქართველოს მთავრობის №4, №400, №442, №426 და №407 დადგენილებებში.

„აღნიშნული ცვლილებები მიზნად ისახავს მგზავრთა უსაფრთხოების ხელშეწყობას, ავტოსატრანსპორტო შემთხვევების შემცირებას, საგზაო უსაფრთხოების განვითარებასა და საავტომობილო ტრანსპორტის დარგში კონკურენტული გარემოს შექმნას.

ახალი რეგულაციით იცვლება რეგულარულ სამგზავრო გადაყვანაში მხოლოდ M3 კატეგორიის სატრანსპორტო საშუალებების გამოყენების მოთხოვნა. ამასთან, ქვეყნის შიდა რეგულარული სამგზავრო გადაყვანის განხორციელებისას სავალდებულო ხდება სატრანსპორტო საშუალებების აღჭურვა ტაქოგრაფით და სიჩქარის შემზღუდველი მოწყობილობით. აღნიშნული მოთხოვნა ვრცელდება M1 (მინივენი), M2 და M3 კატეგორიის ავტოსატრანსპორტო საშუალებებზე, რომელიც უზრუნველყოფს მძღოლის სამუშაო და დასვენების რეჟიმებისა და გადაადგილების სიჩქარის კონტროლს.

ახალი ვალდებულების ამოქმედებისთვის დადგენილია შემდეგი ვადები:
ტაქოგრაფი:
•    თბილისი – ბათუმი: 2027 წლის პირველი ივნისიდან;
•    სხვა ყველა 50 კილომეტრზე მეტი მანძილით დაშორებული დასახლება: 2027 წლის პირველი დეკემბრიდან.
სიჩქარის შემზღუდველი მოწყობილობა:
•    თბილისი – ბათუმი: 2027 წლის პირველი მარტიდან;
•    სხვა ყველა დასახლება: 2027 წლის პირველი დეკემბრიდან.

აღნიშნული მიდგომა შექმნის დაბალანსებულ და საერთაშორისო პრაქტიკასთან შესაბამის საკანონმდებლო ჩარჩოს, რომელიც ერთდროულად უზრუნველყოფს მგზავრთა უსაფრთხოების ხელშეწყობას, ავტოსატრანსპორტო შემთხვევების შემცირებას, საგზაო უსაფრთხოების განვითარებასა და საავტომობილო ტრანსპორტის დარგში კონკურენტული გარემოს შექმნას“, – ნათქვამია სახმელეთო ტრანსპორტის სააგენტოს მიერ გავრცელებულ ინფორმაციაში.