როგორ უნდა შეამოწმოთ, გაუვიდა თუ არა ვადა აშშ-ის ვიზას?

ამერიკის საელჩო აშშ-ში მყოფ საქართველოს მოქალაქეებს მოუწოდებს, გადაამოწმონ, რამდენ ხანს აქვთ ქვეყნის ტერიტორიაზე ლეგალურად ყოფნის უფლება.

საელჩო მოქალაქეებს აწვდის ინფორმაციას, რა განსაზღვრავს ამერიკის შეერთებულ შტატებში მათი დარჩენის ხანგრძლივობას.

„შეგახსენებთ, საერთაშორისო ვიზიტორისთვის ამერიკის შეერთებულ შტატებში დარჩენის ვადას განსაზღვრავს საიმიგრაციო ოფიცერი აშშ-ში ჩასვლისას და არა თქვენი B1/B2 ვიზიტორის ვიზის ვადის გასვლის თარიღი. შეამოწმეთ თქვენს I-94 ფორმაზე მითითებული „Admit Until“ თარიღი, რათა გაიგოთ, რამდენ ხანს გაქვთ აშშ-ში დარჩენის უფლება“, – ნათქვამია განცხადებაში.

როგორც გავრცელებულ ინფორმაციაშია აღნიშნული, ქვეყანაში არალეგალურად ყოფნის თავიდან აცილების მიზნით, შეერთებული შტატები ვიზიტორმა „Admit Until” თარიღამდე უნდა დატოვოს.

იმის გადასამოწმებლად, კიდევ აქვს თუ არა ვადა თქვენს ვიზას, უნდა ეწვიოთ მითითებულ ბმულს .

ბმულზე გადასვლის შემდეგ, პირველ რიგში, დაეთანხმებით მომსახურების პირობებს („Terms of Service“). მას შემდეგ, რაც მონიშნავთ ველს, რომ ინფრომირებული ხართ აღნიშნულ პირობებთან დაკავშირებით, ვებგვერდი ავტომატურად გადაგიყვანთ ანკეტაზე, სადაც თქვენი პირადი მონაცემების შეყვანა იქნება საჭირო. შესაბამისი პროცედურის გავლის შემდეგ, მიიღებთ პასუხს, ჯერ კიდევ ვარგისია თუ არა თქვენი ვიზა.

ცნობისთვის, აშშ-ის საელჩომ უკვე დაიწყო ამერიკაში მყოფ იმ საქართველოს მოქალაქეებთან პირდაპირი დაკავშირებაც, რომლებმაც, შესაძლოა, ვიზის ვადას გადააცილეს. საელჩო მათ უშუალოდ აწოდებს ინფორმაციას იმის შესახებ, თუ როგორ გადაამოწმონ, რამდენი ხნით შეუძლიათ დარჩენა შეერთებული შტატების ტერიტორიაზე და რა შედეგები შეიძლება მოჰყვეს სავიზო პირობებზე ვადაგადაცილებას.

შეგახსენებთ, რომ აშშ საიმიგრაციო პოლიტიკას მნიშვნელოვნად ამკაცრებს. 14 იანვარს ცნობილი გახდა, რომ შეერთებულმა შტატებმა საიმიგრაციო ვიზების გაცემა საქართველოს მოქალაქეებისთვისაც შეაჩერა. პაუზა 21 იანვარს შევიდა ძალაში და განუსაზღვრელი ვადით გაგრძელდება იქამდე, ვიდრე სახელმწიფო დეპარტამენტი სავიზო პროცედურების ხელახლა შეფასებას არ დაასრულებს.