როგორ უნდა მოიქცეთ, თუ ცრემლსადენი გაზი და წიწაკის სპრეი გამოიყენეს

7 მარტის აქციის დარბევისას პოლიციამ და სპეციალური რაზმის ქვედანაყოფებმა წიწაკის სპრეი და ცრემლსადენი გაზი გამოიყენეს.

სპრეიც და ცრემლსადენი გაზიც დიდ ფიზიკურ დისკომფორტს — ტკივილს, წვას, გულისრევასა და სხვა სიმპტომებს იწვევს. ასეთ დროს მნიშვნელოვანია სიმპტომებთან ბრძოლის სწორი გზა, რათა უფრო არ გამწვავდეს.

პირველადი დახმარების ცენტრი • First Aid Center რჩევები, თუ როგორ უნდა მოიქცეთ, თუ ამგვარ სიტუაციაშ მოხვდით.

„მიხედავად იმისა, რომ წიწაკის სპრეის და/ან ცრემლსადენი გაზის საწინაღმდეგო სწრაფმოქმედი ანტიდოტი არ არსებობს და სიმპტომები ერთი შეხედვით მწვავეა, რაც გამოიხატება სუნთქვის გაძნელებით, წვის შეგრძნებით, მხედველობის დროებითი გაუარესებით, ხველით და ა.შ. ის აბსოლუტურ უმრავლეს შემთხვევაში არ არის სასიკვდილო და პირველ რიგში, ეცადეთ, არ აყვეთ პანიკას:

• გეკეთოთ ნიღაბი და დამცავი სათვალე.
• უმჯობესია, მოიხსნათ ლინზები.

სპრეით/გაზით დაზიანების შემთხვევაში:

• დატოვეთ ადგილი და გადაინაცვლეთ უსაფრთხო ადგილას;
• ან იქონიეთ წყალი ან ფიზიოლოგიური ხსნარი (ალტერნატივად შესაძლოა გამოყენებულ იქნას რძეც) და ჩამოიბანეთ არე ხანგრძლივად (არ დაისხათ შუბლზე, ამან შესაძლოა ნივთიერება ”ჩარეცხოს” თვალებში);
• არ ეცადოთ თვალის ძალით გახელას;
• თუ ლინზა გიკეთიათ დაზიანების დროს, მოიხსენით ის სუფთა ხელებით;
• მოიშორეთ დაბინძურებული ტანსაცმელი, მიიღეთ შხაპი, ჩამოიბანეთ შამპუნით ან საპნით ან გელით, გრილი/ნელთბილი წყლით 10 – 15 წთ-ს განმავლობაში, უწყვეტი ჭავლით;
• არ დაიზილოთ დაზიანებული არე;
• სიმპტომების გაძლიერებისას, განსაკუთრებით თანმხლები ქრონიკული დაავადებების (მაგალითად ასთმა) შემთხვევაში, მიმართეთ ექიმს,“ – წერს ცენტრი.