როგორ უნდა გაიგოთ,უფასო ფაკულტეტზე ჩარიცხვის შემთხვევაში სწავლას სახელმწიფო დააფინანსებს თუ თავად მოგიწევთ გადახდა

საქართველოში სახელმწიფო უნივერსიტეტებში განსაზღვრულ პროგრამებზე სტუდენტებს სწავლა სრულიად უფასოდ შეუძლიათ. გადასახადს 4 წლის განმავლობაში სახელმწიფო აფინანსებს. თუმცა, ზოგიერთ უნივერსიტეტში, კონკრეტულ პროგრამაზე სტუდენტთა განსაზღვრული რაოდენობა ფინანსდება, სხვას კი ჩვეულებრივ უწევს გადასახადის გადახდა. მას შემდეგ, რაც შეფასებისა და გამოცდების ეროვნულმა ცენტრმა 2024 წლის გამოცდების საბოლოო შედეგები გამოაქვეყნა, აბიტურიენტთა ჯგუფებში არაერთი შეკითხვა დაისვა, როგორ უნდა გაარკვიონ, ე.წ. უფასო ფაკულტეტზე ჩარიცხვის შემთხვევაში, სწავლას სახელმწიფო დააფინანსებს თუ თავად მოუწევთ გადახდა.

როგორც შეფასებისა და გამოცდების ეროვნულ ცენტრში განაცხადეს, სტუდენტებმა ამ საკითხთან დაკავშირებით კონკრეტულ უნივერსიტეტს უნდა მიმართონ და მათთან გაარკვიონ, დაუფინანსდებათ თუ არა სახელმწიფოსაგან სწავლა სრულად.

როგორც უკვე აღვნიშნეთ, ზოგიერთ უნივერსიტეტში ე.წ. უფასო ფაკულტეტებზე ჩარიცხული ყველა სტუდენტი ფინანსდება, ზოგან კი მხოლოდ განსაზღვრული რაოდენობა.

მაგალითად, საქართველოს ტექნიკურ უნივერსიტეტში 36 საბაკალავრო პროგრამას სახელმწიფო სრულად აფინანსებს, რაც ნიშნავს იმას, რომ ამ პროგრამებზე ჩაბარების მსურველ აბიტურიენტებს, მიუხედავად იმისა, მიიღებენ თუ არა სახელმწიფო გრანტს, სწავლის შესაძლებლობა უფასოდ ექნებათ.

2024-2025 სასწავლო წელს სახელმწიფოსგან სრულად დაფინანსებული, აკრედიტებული პროგრამების ჩამონათვალი კი შეგიძლიათ, იხილოთ ბმულზე.

აღსანიშნავია, რომ შეფასებისა და გამოცდების ეროვნული ცენტრი უნივერსიტეტებს სტუდენტთა რანჟირებულ სიას უგზავნის. თუ, მაგალითად, პროგრამაზე 200 სტუდენტი ჩაირიცხა, მათგან კი 100-ს სახელმწიფო აფინანსებს, უნივერსიტეტი რანჟირებული სიის მიხედვით, პირველ 100 სტუდენტს მიანიჭებს დაფინანსებას, დანარჩენი 100 კი თანხას ჩვეულებრივ გადაიხდის.

როგორც თბილისის სახელმწიფო უნივერსიტეტსა და ილიას სახელმწიფო უნივერსიტეტში განაცხადეს, სტუდენტს რეგისტრაციის დროსაც ეტყვიან, ჩაირიცხა თუ არა სახელმწიფოს მიერ დაფინანსებულ პროგრამაზე.

2024 წელს ჩარიცხულთა რანჟირებული სია შეგიძლიათ, იხილოთ ბმულზე.

სახელმწიფოს მიერ დაფინანსებული ფაკულტეტების შესახებ ინფორმაციას კი დეტალურად გაეცანით ბმულზე.

რამდენი ადგილი ფინანსდება კონკრეტულ პროგრამაზე და მოხვდით თუ არა დაფინანსებულთა სიაში, ინფორმაცია იმ უნივერსიტეტთან უნდა გადაამოწმოთ, სადაც ჩააბარეთ ან რანჟირებული სიით იხელმძღვანელოთ.

წყარო – mshoblebi.ge