ჩოხატაურში მთელი კვირის განმავლობაში, მიმდინარეობდა და გრძელდება ახალი კორონა ვირუსის GOVID – 19 – ის გავრცელების საწინააღმდეგო პრევენციული ღონისძიებების გატარება. ჩოხატაურის მუნიციპალიტეტის მერიის საზოგადოებასთან ურთიერთობის განყოფილების უფროსის, იამზე ვაჩეიშვილის თქმით, საზღვარგარეთიდან ჩამოსული თვითიზოლაციაში მყოფი ჩოხატაურის მაცხოვრებლების მონიტორინგი სისტემატიურად ხორციელდება. – თვითიზოლაციისათვის არასათანადო პირობების გამო, ერთი მოქალაქე გადაყვანილი იქნა საკარანტინე სივრცეში, – გვითხრა ვაჩეიშვილმა.
როგორც მერიაში განმარტეს, სკოლებს, საბავშვო ბაღებს, ყველა საჯარო დაწესებულებას, ჩაუტარდა დეზინფექცია. სისტემატიურად ხდება საქალაქთაშორისო ტრანსპორტის სპეციალური ხსნარით დამუშავება და მინდინარეობს სასურსათო მარაგის გადამოწმება. _ საქართველოს პრემიერ მინისტრთან შექმნილი უწყებათაშორისი საკოორდინაციო საბჭოს რეკომენდაციის შესაბამისად, შეიზღუდა მიკროავტობუსებით მოქალაქეთა მომსახურება, ასევე, შეზღუდვები დაწესდა საზოგადოებრივი კვების ობიექტების ფუნქციონირებაზე. ყველა ასეთ ობიექტს აეკრძალა, მათ კუთვნილ ფართში ვიზიტორების მიღება, თუმცა ნებადართულია მიტანის სერვისის განხორციელება. დროებით დაიხურა სავაჭრო ობიექტები, სასურსათო მაღაზიებისა და აფთიაქების გარდა. კერძო ტაქსების მფლობელებს მიეცათ შესაბამისი რეკომენდაციები. მუნიციპალიტეტის მერიასა და საკრებულოში დაწესდა მოქალაქეთა მომსახურების რეგულაცია, _ განაცხადა ჩოხატაურის მერმა ირაკლი კუჭავამ მისივე თქმით, ჩოხატაურის თვითმმართველობა კვლავ გააგრძელებს საქართველოს მთავრობისა და გურიის სამხარეო ადმინისტრაციის რეკომენდაციებით მოქმედებას. _ მადლობას ვუხდით ჩვენს თანამოქალაქეებს, შექმნილ ვითარებაში გამოჩენილი მოქალაქეობრივი თვითშეგნებისა და სოლიდარობის გამოვლენისათვის, _ აღნიშნა ჩოხატაურის მერმა.
Loading ...