როგორი უნდა იყოს ეპიდსიტუაცია ქვეყანაში „კომენდანტის საათი“ რომ მოიხსნას? – გამყრელიძის პასუხი

როგორი უნდა იყოს ეპიდსიტუაცია, რომ ქვეყანაში ე.წ კომენდანტის საათი მოიხსნას? – ამ კითხვას დაავადებათა კონტროლის ეროვნული ცენტრის ხელმძღვანელმა ამირან გამყრელიძემ „ტვ პირველის“ ეთერში უპასუხა.
„ეს არ იქნება გაუქმებული ერთი ინდიკატორით. ეს არ იქნება მხოლოდ შემთხვევათა რაოდენობის შემცირებით, დადებითობის მაჩვენებლის შემცირებით განპირობებული. აქ რამდენიმე ინდიკატორია, მათ შორის როგორია საწოლფონდის დატვირთვის მაჩვენებელი, რამდენი ავადმყოფია საავადმყოფოში, რამდენი ავადმყოფი გვყავს ხელოვნურ სუნთქვაზე და კიდევ მრავალი ინდიკატორით ხდება შეჯამება და იმის მიხედვით მიიღება გადაწყვეტილება.
შემსუბუქების სხვადასხვა სახეს აქვს თავისი წონადი მნიშვნელობა, ანუ რომელი უფრო მეტ რისკს მოიცავს ინფექციის შემდგომი გავრცელების კუთხით“, – განაცხადა გამყრელიძემ.
მისივე თქმით, ის სოლიდარულია იმ ხალხის მიმართ, ვინც აპროტესტებს შეზღუდვებს. „შეიძლება მეც ვღიზიანდები ამის გამო შინაგანად, მაგრამ მეორე მხრივ, ადამიანების სიცოცხლე დევს სასწორის მეორე მხარეს. აბა იმ 3000 ადამიანის ოჯახებს ჰკითხეთ, რომლებიც გარდაიცვალა ამ ხნის განმავლობაში“, – დასძინა მან.