როგორი ამინდი იქნება თებერვალში

თებერვლის თვეში ტემპერატურა კლიმატურ ნორმასთან შედარებით 1 გრადუსით მაღალი იქნება. ამის შესახებ გარემოს ეროვნული სააგენტოს ჰიდრომეტეოროლოგიური პროგნოზების სამმართველოს უფროსმა, სვეტლანა ნიორაძემ განგვიცხადა:

“თებერვალში ტემპერატურა კლიმატურ ნორმასთან შედარებით 1 გრადუსით მაღალი იქნება, ნალექები კი ნორმაზე ნაკლები და მასთან ახლოს. შედარებით ცივი იქნება თებერვლის პირველი დეკადა. არ არის გამორიცხული, რომ ცალკეულ დღეებში ყინვა დაფიქსირდეს. დასავლეთ საქართველოს დაბლობში -2 გრადუსამდე, ხოლო აღმოსავლეთ საქართველოში, უფრო მეტად შიდა ქართლსა და კახეთში -8, -9 გრადუსამდე დაეცეს ტემპერატურა. დღისით ტემპერატურა მოიმატებს და შესაძლოა, ცალკეულ დღეებში +20 გრადუსამდეც კი დაფიქსირდეს. თუმცა, ეს უფრო თვის მეორე ნახევრიდანაა მოსალოდნელი.” – ამბობს ის.

რაც შეეხება მიმდინარე დღეების ამინდის პროგნოზს, სვეტლანა ნიორაძის განმარტებით, პირველი თებერვლიდან ამინდი ისევ შეიცვლება.

“გუშინ დასავლეთ საქართველოში ყველგან წვიმდა, ზოგან თოვდა, აღმოსავლეთ საქართველოშიც გასულ ღამეს მცირე ნალექი აღინიშნა. ეს არამდგრადი ამინდი 4 თებერვლამდე შენარჩუნდება.” – გვითხრა სვეტლანა ნიორაძემ.

წყარო-mshoblebi.ge