მცხეთასთან მომხდარი ავარიის შედეგად დაშავებული 5 ადამიანი სასწრაფო დახმარების ავტომობილებით სამ სხვადასხვა კლინიკაში გადაიყვანეს. ერთ-ერთი მათგანი, ახალგაზრდა მამაკაცი კლინიკა „ვივამედშია“ მოთავსებული, რომელსაც ამ დროისთვის ოპერაცია უტარდება.
როგორც „ინტერპრესნიუსს“ კლინიკა „ვივამედის“ კლინიკურმა დირექტორმა ზურაბ ჩხაიძემ განუცხადა, დაშავებული მამაკაცი სასწრაფო-სამედიცინო ბრიგადამ მათთან სხეულის მრავლობითი დაზიანებებით შეიყვანა.
„მამაკაცს დაზიანებები აღენიშნება გულ-მკერდის და მუცლის არეში, ასევე აქვს შინაგანი სისხლდენა. ამ დროისთვის ის საოპერაციოშია“, – განაცხადა ზურაბ ჩხაიძემ.
რაც შეეხება ავარიის დროს დაშავებულ კიდევ 4 პირს, ისინი მცხეთის სამედიცინო ცენტრში და მცხეთის „ჯეო ჰოსპიტალში“ არიან მოთავსებული.
შეგახსენებთ, რომ მცხეთასთან მომხდარ ავარიას ერთი ადამიანის სიცოცხლე ემსხვერპლა, 5 ადამიანი კი დაშავდა.
მიკროავტობუსი, რომელშიც რამდენიმე მგზავრი იმყოფებოდა, ჯებირს შეეჯახა, რის შემდეგაც ცეცხლი გაუჩნდა.
Loading ...