როგორია ვაზისუბანში აფეთქების შედეგად დაშავებულთა ჯანმრთელობის მდგომარეობა

ისნის რაიონის გამგებელის ნიკა ელისაშვილის ინფორმაციით, ვაზისუბნის დასახლების მე-15 კორპუსში, პირველ სართულზე აფეთქება გაზის გაჟონვის შედეგად მოხდა.

მისივე ინფორმაციით, აფეთქების შედეგად სულ 5 ადამიანი დაშავდა. ნიკა ელისაშვილის თქმით, ერთი ადამიანი, მძიმედ არის, ხოლო 4 ადამიანის სიცოცხლეს საფრთხე არ ემუქრება.

“ჩვენი ინფორმაციით, გაზის გაჟონვა მოხდა, რის შედეგადაც მოხდა აფეთქება. სხეულის დაზიანება მიიღო 5-მა ადამიანმა. ხუთივე მათგანი გადაყვანილია კლინიკებში. ამ ეტაპზე, ხანძარი ლიკვიდირებულია და მიმდინარეობს სხვადასხვა სამუშაოები, თუ რამ გამოიწვია აფეთქება და ხანძარი.

ჩვენი ინფორმაციით, ადამიანმა, რომელმაც მძიმე დაზიანება დამწვრობა მიიღო, მძიმედ არის, დანარჩენი 4 ადამიანი ინტოქსიკაციით არის გადაყვანილი და მათ სიცოცხლეს საფრთხე არ ემუქრება”,- განაცხადა რაიონის გამგებელმა.

დამწვრობის ცენტრის მორიგე რეანიმატოლოგის, გიორგი ბენიძის განცხადებით  სასწრაფო დახმარების სამსახურმა კლინიკაში 43 წლის მამაკაცი დაახლოებით 1,5 საათის წინ მიიყვანა. მას სხეულის 35%-ზე მეორე/მესამე ხარისხის დამწვრობა აღენიშნება. მისი ჯანმრთელობის მდგომარეობა, ამ დროისთვის, დასტაბილურდა, თუმცა ის ამ დრომდე რეანიმაციაში რჩება.