რაჟდენ კუპრაშვილის უწყება არასამთავრობო ორგანიზაციებისგან ბენეფიციარების პერსონალური მონაცემების გაცემას 3 კანონის საფუძველზე მოითხოვს.
დღეს, 18 ივნისს არასამთავრობო ორგანიზაციების ნაწილმა განცხადება გაავრცელეს, სადაც აღნიშნავდნენ, რომ 17 ივნისს “ივანიშვილ-კუპრაშვილის ბიურომ ანტიკონსტიტუციური რუსული კანონების აღსრულება მურუსიძის სასამართლოს მეშვეობით დაიწყო”. უწყებამ NGO-ებს მათი დაცვის ქვეშ მყოფი მოქალაქეების პერსონალური მონაცემები მოსთხოვა.
ტაბულა აღნიშნულთან დაკავშირებით საერთაშორისო გამჭვირვალობა – საქართველოს ადამიანის უფლებათა და მართლმსაჯულების პროგრამის მენეჯერს, სანდრო ბარამიძეს ესაუბრა.
ბარამიძის განცხადებით, კუპრაშვილის უწყებამ ორგანიზაციებს 3 კანონის საფუძველზე მიმართა, საუბარია კორუფციის წინააღმდეგ ბრძოლის შესახებ, მოქალაქეთა პოლიტიკური გაერთიანების შესახებ და გრანტების შესახებ კანონებზე. აღსანიშნავია, რომ საუბარი არ არის ე.წ. FARA-ს ანალოგზე.
“მიუთითეს 3 კანონზე, ერთია – კორუფციის წინააღმდეგ ბრძოლის შესახებ კანონი, მეორე – მოქალაქეთა პოლიტიკური გაერთიანების შესახებ ორგანული კანონი, მესამე – გრანტების შესახებ კანონი. სამოქალაქო ან ადმინისტრაციული საპროცესო კოდექსის კონკრეტულ ნორმაზე ვერ მიუთითეს დაწერეს, რომ ვიყენებთ კანონის ანალოგიასო, მაგრამ რომელი კანონის ანალოგიას იყენებენ ეს არ ვიცით”. – უთხრა ბარამიძემ ტაბულას.
მისივე განმარტებით, აღნიშნული კანონებიდან ორი არასამთავრობო ორგანიზაციებზე არ ვრცელდება. რაც შეეხება გრანტების შესახებ კანონს, კუპრაშვილის უწყება კანონის ამოქმედებამდე პერიოდშიც მოითხოვს ინფორმაციის მიწოდებს. ასევე ითხოვს ისეთ პერსონალურ მონაცემებს, რომელსაც გრანტების შესახებ კანონი არ ითვალისწინებს.
საუბარია გრანტების შესახებ კანონის მე-6 პრიმა მუხლზე, რომელიც 2025 წლის 16 აპრილს მიღებული ცვლილებებით დამტკიცდა.
“მთლიანობაში, ჩვენი პოზიცია ამასთან დაკავშირებით ასეთია – რადგან საპროცესო ნორმა არ აქვთ, შესაბამისი ბრძანების გამოცემის უფლება რაღაც არარსებული კანონის ანალოგიით, სასამართლოს არ ჰქონდა – ეს ერთი.
მეორე – თუნდაც ჰქონოდა, კორუფციის წინააღმდეგ ბრძოლის შესახებ კანონზე მითითება არარელევანტურია, ეს კანონი ეხება საჯარო დაწესებულებაში კორუფციას, ჩვენ არ ვართ საჯარო დაწესებულება. აქედან გამომდინარე, რა უფლებამოსილებაც არ უნდა ჰქონდეს კუპრაშვილს კორუფციის წინააღმდეგ ბრძოლის შესახებ კანონიდან გამომდინარე, ჩვენ არ გვეხება. ასევე არ გვეხება ორგანული კანონი მოქალაქეთა პოლიტიკური გაერთიანების შესახებ, ჯერ ერთი ჩვენ არ ვართ პარტია, მეორე – ჩვენ არ ვართ გაცხადებული საარჩევნო მიზნის მქონე სუბიექტი.
ამგვარად, ჩვენ არ ვუცნივართ, მათ შორის, არც კუპრაშვილს გაცხადებული საარჩევნო მიზნის მქონე სუბიექტად, შესაბამისად, ამ კანონის გამოიყენება არარელევანტურია.
რჩება გრანტების შესახებ კანონი, ოღონდ, ესენი ითხოვენ ინფორმაციას 2024 წლის იანვრიდან, მიმდინარე წლის 10 ივნისამდე, 2025 წლის 16 აპრილამდე პერიოდი ასევე არარელევანტურია, იმიტომ, რომ მანამდე გრანტების შესახებ კანონიდან გამომდინარე, არავითარი უფლებამოსილებები კუპრაშვილს არ ჰქონდა. ამიტომ ერთადერთი შეიძლება მოეთხოვა 2025 წლის 16 აპრილის შემდგომი პერიოდი ეს ერთი.
მეორე – ინფორმაციას მოითხოვს ძალიან ბევრს, არადა გრანტების შესახებ კანონიდან გამომდინარე, მას შეუძლია მოითხოვოს ინფორმაცია მხოლოდ იმ საკითხის გასარკვევად, ჩვენ რომელიმე გრანტი უცხოელი დონორისგან მთავრობის თანხმობით მივიღეთ თუ თანხმობის გარეშე. მხოლოდ ამ საკითხთან დაკავშირებით შეეძლო ინფორმაციის გამოთხოვა, არადა მოითხოვენ უზარმაზარი მოცულობის ინფორმაციას, რომელსაც არ აქვს შეხება იმ საკითხთან, თანხმობა გვქონდა თუ არა”. – ამბობს ბარამიძე.
მისივე განცხადებით, აღნიშნულ განჩინებებს სასამართლოში გაასაჩივრებენ.
არასამთავრობო ორგანიზაციების განცხადებით, რეჟიმმა მათგან გამოითხოვა ისეთი პერსონალური მონაცემები, როგორებიცაა: “წამების მსხვერპლების, ძალადობის მსხვერპლი ქალების, მოსწავლეების, სტუდენტების, მასწავლებლების, პენსიონერების, შშმ პირების, მეწარმეების, მამხილებლების, ჟურნალისტების, დამკვირვებლების, უკანონოდ გათავისუფლებული საჯარო მოხელეებისა და მათი ოჯახის წევრების პერსონალური ინფორმაციის გადაცემას, კერძოდ, ყველა იმ ადამიანის პირადი ნომრების, სახელების, გვარების, ფოტოსურათების, ფინანსური და საბანკო ინფორმაციისა და ჯანმრთელობის მდგომარეობის ინფორმაციის გადაცემას, ვინც გვენდობოდა და ჩვენი დახმარებით უსარგებლია”.
Loading ...