სააღდგომო პასკის მომზადების ფასი წლიდან წლამდე იცვლება. მიმდინარე წელს გაზრდილია ძირითადი ინგრედიენტების ფასები, რაც თავის მხრივ ისახება პასკის თვითღირებულებაზე. ამ ფონზე „ბიზნესპრესნიუსი“ დაინტერესდა, რა ჯდება პასკის მომზადება წელს.
ფასების ცვლილებას თუ გადავხედავთ, სტატისტიკის ეროვნული სამსახურის მონაცემები აჩვენებს, რომ 2026 წლის მარტში, წინა წლის იმავე თვესთან შედარებით, ყველაზე მეტად გაძვირდა ფქვილი, მას კი მოსდევს კვერცხი, კარაქი და რძე. ამავე პერიოდში წლიურ გაიაფებას აჩვენებს შაქარი და ქიშმიში.
უფრო კონკრეტულად, მარტში წლიურად 13%-ით გაიზარდა ფქვილის, 2%-ით – კვერცხის, 1.4%-ით – კარაქის, ხოლო 0.5%-ით ქარხნული რძის ფასი. ამის პარალელურად 0.34%-ით გაიაფდა ქიშმიში, ხოლო 12.6%-ით შემცირდა შაქრის ფასი.
რა ჯდება წელს პასკის მომზადება
წელს 1 ლიტრი ქარხნული რძის ფასი 2.95 ლარიდან იწყება და 5.85 ლარსაც კი აღწევს. ამასთანავე, 1 კგ ფქვილის ფასი 2.35 ლარიდან, ხოლო შაქრის ფასი 1.75 ლარიდან იწყება.
რაც შეეხება კვერცხს, 10-ცალიანი შეფუთვის ფასი მარკეტებში 4.6 ლარიდან იწყება და 5.9 ლარს აღწევს. საცალო ვაჭრობის ობიექტებში კი 1 ცალი კვერცხის ფასი 40-50 თეთრის ფარგლებში მერყეობს.
აღსანიშნავია, რომ მარკეტებსა და ბაზარში არსებული ფასების მიხედვით 1 კგ კარაქის ფასი 30 ლარიდან იწყება 45 ლარის ფარგლებში მერყეობს.
მარკეტებსა და საცალო ვაჭრობის ობიექტებში 1 კგ ცუკატის ფასი წელს 12 ლარიდან იწყება და 13 ლარამდეა. რაც შეეხება ქიშმიშს, 1 კგ-ის ფასი 9 ლარიდან იწყება და 13.4 ლარს აღწევს.
www.bpn.ge
Loading ...