რა შემთხვევაში განიხილება “მწვანე პასპორტების” მოქმედების არეალის გაფართოება? – გაბუნიას პასუხი

ჯანდაცვის მინისტრის მოადგილე თამარ გაბუნია ამბობს, რომ “მწვანე პასპორტების” გამოყენების არეალის გაფართოება შესაძლებელია, თუმცა მას შემდეგ, რაც 1-ელი დეკემბრიდან მისი პირველი ეტაპი ამოქმედდება.

გაბუნიას თქმით, ეპიდემიოლოგიური მიზნებისთვის ყველას ესმის, რომ რაც მეტ სექტორში ამოქმედდება “მწვანე ბარათები”, მით უკეთესი შედეგი დადგება.

“ამ ეტაპზე საშვის მოქმედებისთვის სამი სექტორია შერჩეული და მნიშვნელოვანია, როგორ ამოქმედდება არსებულ სექტორებში ის. მნიშვნელოვანია, რომ “მწვანე საშვის” მოქმედება უხარვეზოდ გაეშვას. მკაცრი და სწორი აღსრულების პირობებში შეიძლება დადებითი შედეგის მოლოდინი გვქონდეს. შედეგების და ეპიდვითარების გათვალისწინებით შეიძლება ვიფიქროთ “მწვანე ბარათების” მოქმედების არეალის გაფართოებაზე, რასაც ევროპის ქვეყნები იყენებენ. ევროპაში “მწვანე საშვი” მოქმედებს საგანმანათლებლო, საუნივერსიტეტო სივრცეებში, ჩვენთან უკვე მოქმედებს საკონფერენციო სივრცეებში. ვნახოთ, სამომავლოდ რა იქნება, 1-ელი დეკემბრის შემდეგ, როცა პირველი შედეგი გვექნება, ეთიკური და ადმინისტრირების ასპექტების გათვალისწინებით გაფართოებას დავუჭერთ მხარს”, – განაცხადა თამარ გაბუნიამ.

ინფორმაციისთვის, მთავრობის უწყებათშორისი საბჭოს გადაწყვეტილებით, 1-ელი დეკემბრიდან ე.წ „მწვანე პასპორტის“ კონცეფცია ამოქმედდება. კერძოდ, პირს მწვანე სტატუსი აქვს, თუ იგი ვაქცინირებულია სრულად, ჩატარებული აქვს 72-საათიანი ვალიდურობის PCR-ტესტი ან 24-საათიანი ვალიდურობის ანტიგენ-ტესტი, ან გადატანილი აქვს კორონავირუსი. „მწვანე პასპორტის“ მოთხოვნა იმოქმედებს 18 წლის ასაკის ზემოთ მოქალაქეებისთვის.

საკოორდინაციო საბჭოს გადაწყვეტილებით, 1-ელი დეკემბრიდან მოქალაქეები მხოლოდ და მხოლოდ „მწვანე პასპორტის“ პრინციპით შეძლებენ შესვლას: კვების ობიექტების, რესტორნების, კაფეების და ბარების ღია და დახურულ სივრცეებში, კინოთეატრებში, თეატრებში, ოპერაში, მუზეუმებში, საკონცერტო დარბაზებში, გასართობ ცენტრებში, სამორინეებსა და სათამაშო ბიზნესის ობიექტებზე, სპა-ცენტრებში, ფიტნეს-დარბაზებში, სასტუმროებში და ასევე სამთო კურორტების – საბაგირო გზებზე; აღნიშნული მოთხოვნა გავრცელდება ჩამოთვლილი ობიექტების სტუმრებზე. რაც შეეხება საბავშვო-გასართობ ცენტრებს, „მწვანე პასპორტის“ მოთხოვნა იმოქმედებს მხოლოდ 18 წლის ასაკს ზემოთ მოქალაქეებისთვის.

www.bm.ge