რა ღონისძიებები იგეგმება ხვალ თბილისში დამოუკიდებლობის დღესთან დაკავშირებით

თავისუფლების მოედანზე საქართველოს დამოუკიდებლობის დღის აღსანიშნავ ღონისძიებასთან დაკავშირებით მზადება დღის განმავლობაში მიმდინარეობდა.

საქართველოს დამოუკიდებლობის დღეს გაიმართება ფიცის დადების ცერემონიალი. როგორც თავდაცვის ძალების მთავარმა სერჟანტმა გიორგი გოგოჭურმა აღნიშნა, ხვალ ფიცს დადებს 247 რეკრუტი. თბილისის გარდა, წვევამდელები ფიცს დადებენ ხუთ რეგიონში.

„მინდა, წინასწარ მივულოცო საქართველოს 26 მაისი. განსაკუთრებით თავდაცვის ძალების პირად შემადგენლობას, რადგან თავდაცვის ძალები სწორედ ის დანაყოფია, რომელიც უზრუნველყოფს ქვეყნის სუვერენიტეტის დაცვას. ამასთან, მინდა აღვნიშნო, რომ ხვალ, საზეიმო ვითარებაში ფიცს დადებს 247 რეკრუტი. პანდემიის გამო, წელს ძალიან მოკრძალებულად გაიმართება 26 მაისის ღონისძიება. ღონისძიება დაიხურება „სუ-25“-ის ტიპის გამანადგურებლების გადაფრენით“, – განაცხადა გიორგი გოგოჭურმა.

ამასთან, ფიცის დადების შემდეგ, სიტყვით გამოვლენ ქვეყნის პირველი პირები. ღონისძიებას დაესწრება პოლონეთის პრეზიდენტი ანჟეი დუდა.

ღონისძიების შემდეგ, 14:00 საათზე სამხედრო პატივით დაკრძალავენ საქართველოს პირველი რესპუბლიკის ჯარების მთავარსარდალს, საქართველოს ეროვნულ გმირს, გენერალ გიორგი კვინიტაძეს, რომლის ნეშტი საფრანგეთიდან საქართველოში 22 მაისს ჩამოასვენეს.

დღის ბოლოს კი, ზაქარია ფალიაშვილის სახელობის ოპერისა და ბალეტის თეატრში გალა-კონცერტი გაიმართება.

სამინისტროს ცნობით, კორონავირუსის გავრცელების პრევენციის მიზნით, წელს საქართველო ეროვნულ დღესასწაულს მოკრძალებულად ხვდება. შესაბამისად, წინა წლებისგან განსხვავებით თავისუფლების მოედანსა და რუსთაველის გამზირზე არ გაიმართება სახალხო სეირნობა და სხვადასხვა სახის გამოფენები.

მოქალაქეებს საქართველოს დამოუკიდებლობის დღისადმი მიძღვნილი ღონისძიების ნახვის შესაძლებლობა პირდაპირი ეთერის საშუალებით ექნებათ.

1991 წლიდან მოყოლებული, 26 მაისს საქართველო დამოუკიდებლობის დღეს აღნიშნავს.