„გასაგებია ექიმები რომ გვაფრთხილებენ, სახლიდან არ გამოხვიდეთო და მათი სფეროდან გამოდინარე ეს ასეც უნდა იყოს. მაგრამ რა უნდა ქნას ადამიანმა, რომელსაც ყოველდღიური ლუკმა-პური აქვს მოსაპოვებელი?“
– განაცხადა პოლიტიკური მოძრაობა „ტრიბუნას“ ლიდერმა, დავით ჭიჭინაძემ, დღეს გამართულ საფინანსო-საბიუჯეტო კომიტეტის სხდომაზე და იქვე განმარტა ის ჯაჭვური რეაქციები, რომელიც მსგავს ფორს მაჟორულ სიტუაციაში შესაძლოა მივიღოთ.
დავით ჭიჭინაძის განცხადებით, „ჩვენ შეიძლება მივიღოთ ისეთი რეალობა, როდესაც ერთ მხრივ დაგვრჩება ვალდებულებები რომელთა შესრულებასთან მიმართებაშიც, ადამიანები იქნებიან უძლურები, მეორე მხრივ კი სტრუქტურები, რომლებიც ამ კრიზისზე გამდიდრებას შეეცდებიან.
და რა უნდა გააკეთოს სახელმწიფომ ამ დროს?! მითუმეტეს, რომ ქვეყანაში მარაგები არ არსებობს; ჯანდაცვის სფერო დღეს აბსოლუტურად კომერციალიზებულია და არავინ მათ არ ზღუდავს;
ბანკებთან მიმართებაში კი, ადამიანების ვალდებულებების შეცვლა არც კი განიხილება.
ანუ, სახელმწიფოს ფაქტიურად ფორს მაჟორის წინაშე მოუწევს დადგომა, ჩვენ კი არც სახელმწიფოს ფუნქცია ვიცით ასეთ მდგომარეობაში და არც ის, ვინ უნდა მართოს კრიზისულ სიტუაციაში.
დღევანდელ მთავრობის სხდომაზეც მხოლოდ ის გვითხრეს 2-3 დღეში გეტყვით რას ვიზამთო და აქამდე ერთმანეთთან კომუნიკაცია ვინ დაუშალა?!
მოკლედ, თუნდაც იმიტომ, რომ ქვეყანაში არსებულ ფინანსებზე და მათ სწორედ განკარგვაზე გადაწყვეტილებას ვიღებთ ჩვენ, პარლამენტში და შემდეგ მთავრობა ასრულებს, არ მგონია დღეს ისეთი დალხენილი სიტუაცია გვქონდეს, რომ ამ ფინანსებთან დაკავშირებით გარკვეული გადაწყვეტილებები არ იყოს ჩვენთან შესათანხმებელი.
მითუმეტეს რომ ამ პარლამენტში არა მარტო ბანკირების, ხალხის წარმომადგენლებიც არიან.
ამიტომ ვფიქრობ, ეკონომიკური, ფინანსური პროფილის კომიტეტები, პარლამენტი ზოგადად მთავრობასთან ერთად დაინტერესებული უნდა იყოს შეიქმნას ჯგუფი, რომელიც იმუშავებს ისეთ თემებზე, თუ რა ნაბიჯებს დგამს მთავრობა, რა რეზერვებს აგროვებს, სად არის ფული აკუმულირებული და როგორ ვაპირებთ ცხოვრებას ამ ფორს მაჟორულ სიტუაციაში.
რის შემდეგაც უკვე მოხდება მოსახლეობის ინფორმირება, ისევე როგორც ვიღებთ ინფორმაციებს დაინფიცირებული ადამიანების შესახებ.“ – აცხადებს დავით ჭიჭინაძე
Loading ...