რა ვადით გაიცემა აშშ-ის B1/B2 ვიზები საქართველოს მოქალაქეებისთვის და როგორია პირობები

2026 წლის 2 აპრილიდან აშშ-ის სახელმწიფო დეპარტამენტი საქართველოს მოქალაქეებისთვის ახალ წესს ამოქმედებს. კერძოდ, B1/B2 (ტურისტული/ბიზნეს) ვიზის მისაღებად საჭირო იქნება 5 ათასიდან 15 000 დოლარამდე დეპოზიტის გადახდა.

აშშ-ის საელჩოს ინფორმაციით, საქართველოს მოქალაქეებმა საკონსულოს მიერ დადგენილი დეპოზიტი გასაუბრების წარმატებით გავლის შემდეგ უნდა გადაიხადონ, ხოლო იმ შემთხვევაში, თუ გადახდა არ განხორციელდა, ვიზა არ გაიცემა.

„არ გადაიხადოთ დეპოზიტი წინასწარ. გასაუბრების შემდეგ, თუ დააკმაყოფილებთ B1/B2 კატეგორიის ვიზის მოთხოვნებს, საკონსულო ოფიცერი გაგაცნობთ ინსტრუქციას, როგორ უნდა გადაიხადოთ დეპოზიტი“, – აცხადებს აშშ-ის საელჩო.

ვინ წყვეტს აშშ-ში დარჩენის ხანგრძლივობას?

დეპოზიტის პროგრამის ფარგლებში B1/B2 კატეგორიის ვიზის აპლიკანტები, რომლებიც სავიზო მოთხოვნებს დააკმაყოფილებენ, კონსულისგან 3 თვემდე ხანგრძლივობის ერთჯერად ვიზას მიიღებენ. აღსანიშნავია, რომ აშშ-ში დარჩენის საბოლოო ხანგრძლივობას განსაზღვრავს არა ვიზა, არამედ საზღვარზე აშშ-ის შიდა უსაფრთხოების დეპარტამენტის საიმიგრაციო ოფიცერი, რომელიც ადგენს კონკრეტულ ვადას ქვეყანაში შესვლისას.

„პასპორტში აშშ-ის ვიზის ქონა უცხო ქვეყნის მოქალაქეს აძლევს უფლებას, ითხოვოს შეერთებულ შტატებში შესვლის ნებართვა. ვიზა მხოლოდ იმას ადასტურებს, რომ აშშ-ის საელჩოში ან საკონსულოში თქვენი აპლიკაცია საკონსულო ოფიცერმა განიხილა და გადაწყვიტა, რომ თქვენ კვალიფიციური ხართ აშშ-ის სასაზღვრო პუნქტამდე გასამგზავრებლად. სასაზღვრო პუნქტზე აშშ-ის შიდა უსაფრთხოების დეპარტამენტის საიმიგრაციო ოფიცერი წყვეტს ქვეყანაში შესვლის უფლებასა და ხანგრძლივობას“, – განმარტავს ამერიკის საელჩო საქართველოში.

საელჩოს ცნობითვე, რეგულაცია არ ვრცელდება უკვე გაცემულ ვიზებზე.

„სავიზო დეპოზიტის მოთხოვნა რეტროაქტიული არ არის და არ გავრცელდება უკვე გაცემული, მოქმედი B1/B2 კატეგორიის ვიზების მფლობელებზე.

რეგულაციები გავრცელდება საქართველოს ყველა მოქალაქეზე, რომელიც მსოფლიოს ნებისმიერ ქვეყანაში გააკეთებს განაცხადს B1/B2 კატეგორიის ვიზაზე.

სავიზო დეპოზიტის მქონე პირებს არ შეუძლიათ, გამოიყენონ ჩარტერული საავიაციო, ზოგადი საავიაციო, სახმელეთო, ან საზღვაო შესასვლელი პორტები“, – აღნიშნულია აშშ-ის საელჩოს მიერ გავრცელებულ ინფორმაციაში.

www.bpn.ge