რა ეტაპზეა მაგისტრალის გრიგოლეთი–ქობულეთის დარჩენილი მონაკვეთის მშენებლობა?

აღმოსავლეთ–დასავლეთის საერთაშორისო მაგისტრალური გზის გრიგოლეთი–ქობულეთის 11-კილომეტრიან მონაკვეთზე ავტოტრანსპორტის მოძრაობა უკვე გახსნილია, ხოლო დარჩენილ 3-კილომეტრიან მონაკვეთზე სამშენებლო სამუშაოები მიმდინარე წელს დასრულდება.

ამის შესახებ ინფორმაციას ინფრასტრუქტურის სამინისტრო ავრცელებს.

ცნობისთვის, გრიგოლეთი–ქობულეთის მაგისტრალური გზის მშენებლობის პროექტი მოიცავს 14-კილომეტრიანი, 4-ზოლიანი ასფალტ-ბეტონის გზის, 22 სახიდე გადასასვლელის, 4 სატრანსპორტო კვანძის, წყალგამტარი მილებისა და მიწისქვეშა გასასვლელების მოწყობას. პროექტი ევროპის საინვესტიციო ბანკთან (EIB) გაფორმებული სასესხო ხელშეკრულების ფარგლებში ხორციელდება და მისი საერთო ღირებულება 228 მილიონ ლარს შეადგენს.

გრიგოლეთი-ქობულეთის გზის მონაკვეთის და გურიაში მიმდინარე სხვა საგზაო პროექტების სამშენებლო სამუშაოებს ინფრასტრუქტურის მინისტრი რევაზ სოხაძე გაეცნო.

„გურიის რეგიონში საგზაო ინფრასტრუქტურის მშენებლობა აქტიურ რეჟიმში მიმდინარეობს. დღეს დავათვალიერეთ მაგისტრალური გზის 6 კილომეტრიანი და 3-კილომეტრიანი მონაკვეთები, სადაც სამუშაოები ინტენსიურად ხორციელდება და უკვე ტურისტულ სეზონზე გადაადგილება შეუფერხებლად იქნება შესაძლებელი. პარალელურად, აქტიური სამუშაოები მიმდინარეობს შიდასახელმწიფოებრივ გზებზეც, მათ შორის ოზურგეთი–ნინოშვილი–ლესას მეწყრულად დაზიანებულ მონაკვეთზე. ჩვენი ზედამხედველობით, სამშენებლო კომპანიები მაქსიმალურად ცდილობენ, მოსახლეობისთვის დისკომფორტი მინიმუმამდე დაიყვანონ და პროექტები განსაზღვრულ ვადებში დასრულდეს“- განაცხადა რევაზ სოხაძემ.

ამასთან, გურიაში გრძელდება სამტრედია–გრიგოლეთის გზის მესამე მონაკვეთზე დარჩენილი 6 კილომეტრის მშენებლობაც. სამტრედია–გრიგოლეთის ჩქაროსნულ მაგისტრალზე ლანჩხუთი–ლესას 8 კილომეტრიანი, 4-ზოლიანი ახალი გზა 2025 წლის ბოლოს გაიხსნა.