ზამთრის სეზონის დადგომასთან ერთად მოსახლეობაში რესპირატორულმა დაავადებებმა იმატა, მაგრამ როგორ გავარჩიოთ ერთმანეთისგან COVID-19, გრიპი და რესპირატორული სინციტიალური ვირუსი? ამის შესახებ სტატიას sfchronicle.com ავრცელებს.
„COVID-ის და გრიპის ერთმანეთისგან გარჩევა ძალზე რთულია, რადგანაც მათი სიმპტომები ერთმანეთს ძალიან ჰგავს,“ – ამბობს აშშ-ის ჯანდაცვის ეროვნული ინსტიტუტის რესპირატორულ დაავადებათა ექსპერტი ბრუკ ბოზიკი.
ამავე დროს აუცილებელია ინფექციების ერთმანეთისგან გარჩევა, რათა საჭირო მკურნალობა მივიღოთ და ვირუსი სხვებს არ გადავდოთ.
დაავადებათა კონტროლის და პროფილაქტიკის ცენტრის ინფორმაციით, COVID 19-ს და გრიპს საერთო სიმპტომები აქვთ, როგორებიცაა ციებ-ცხელება, მშრალი ხველა, სახსრების ტკივილი და მოთენთილობა.
ამასთანავე, კორონავირუსის ინფექციის ბევრი მაჩვენებელი ახალი შტამების გაჩენის, ვაქცინაციის ან წინა ინფექციის გადატანის შედეგად იმუნიტეტის ზრდის გამო შეიცვალა.
„რაც უფრო მაღალია ადამიანის იმუნიტეტი, მით უფრო სუსტია COVID-ის შედეგად წარმოქმნილი სიმპტომები“, – ამბობს კორონავირუსის და ინფექციური დაავადებების ექსპერტი პიტერ ჩინ-ჩონგი.
ომიკრონის შემთხვევაში ყველაზე გავრცელებული სიმპტომებია სურდო, თავის და ყელის ტკივილი. რაც შეეხება გრიპს, ის ყველაზე ხშირად ხველებით იწყება. რესპირატორული ვირუსი ცემინებით, სურდოთი და ცრემლიანობით ხასიათდება.
კორონავირუსის ადრეული შტამებისთვის დამახასიათებელი სიმპტომები, როგორებიცაა გემოს და სუნის დაკარგვა, ახლა იშვიათად გვხვდება.
გრიპით ინფიცირებულ ადამიანებს სიმპტომები, ძირითადად, 3-4 დღეში უფიქსირდებათ. ამასთანავე, ზოგიერთ ადამიანს ეს სიმპტომები შეიძლება გამოუვლინდეს ინფიცირებიდან 2-3 დღეში, სხვებს კი 14 დღეში.
რესპირატორული ვირუსით ძირითადად ბავშვები და მოხუცები ინფიცირდებიან. ის იწვევს ხველებას, სურდოს და ხიხინს, უმეტეს შემთხვევაში ადამიანი საკმაოდ მალე გამოჯანმრთელდება. 6 თვემდე ჩვილებს რესპირატორული ვირუსის მაჩვენებელია აქტიურობის შემცირება და მადის დაკარგვა, ასევე, სუნთქვის დროს გარკვეული პაუზები. ამასთანავე, რესპირატორულმა ვირუსმა შეიძლება ბრონქიოლიტი ან პნევმონია გამოიწვიოს. არსებობს შესაბამისი ტესტები, რომელთა საშუალებით კონკრეტული ვირუსის ტიპის გამოვლენაა შესაძლებელი.
COVID 19-ის შემთხვევაში საკმაოდ ბევრი სიმპტომი ფიქსირდება – სურდოთი დაწყებული და საკმაოდ მძიმე მდგომარეობით დამთავრებული. სიმპტომების გამოვლენა ინფიცირებიდან 2-14 დღეში ხდება.
✔️ ციებ-ცხელება
✔️ თავის ტკივილი
✔️ მშრალი ხველა
✔️ ტანის/კუნთების ტკივილი
✔️ მოთენთილობა
✔️ გაჭედილი ცხვირი ან სურდო
✔️ ყელის ტკივილი
✔️ სუნთქვის გართულება
გრიპის შემთხვევაში სიმპტომები საკმაოდ მოულოდნელად ჩნდება და ორგანიზმის იმუნიტეტის მიხედვით უფრო მცირე ან უფრო ხანგრძლივი პერიოდი რჩება.
✔️ ციებ-ცხელება
✔️ თავის ტკივილი
✔️ ხველა
✔️ ტანის/კუნთების ტკივილი
✔️ მოთენთილობა
რწსპირატორულ-სინციტიალური ვირუსის შემთხვევაში სიმპტომები ინფიცირებიდან 4-6 დღის შემდეგ ჩნდება. ამაში შედის:
✔️ ციებ-ცხელება (სუსტი ფორმები)
✔️ თავის ტკივილი
✔️ ხველა
✔️ გაჭედილი ცხვირი ან სურდო
✔️ მადის დაკარგვა
✔️ ცემინება
გაციების ზოგადი სიმპტომები
გაციებსის სიმტპომები პიკს ინფიცირებიდან 2-3 დღეში აღწევს და მასში შედის
✔️ ხველა
✔️ გაჭედილი ცხვირი ან სურდო
✔️ ყელ;ის ტკივილი
✔️ ცემინება
როგორც კალიფორნიის ჯანდაცვის და სოციალური სამსახურის მდივანი მარკ გალი აცხადებს, შესაძლებელია ერთზე მეტი ვირუსით ერთდროულად ინფიცირება.
„ყველა ეს ინფექცია დამოუკიდებელი „მოქმედი პირია“. ასე რომ ადამიანები, რომლებიც ერთი ვირუსით ინფიცირდებიან. შეიძლება პარალელურად მეორე ვირუსითაც ინფიცირდნენ და, კიდევ უარესი, შეიძლება რაიმე ბაქტერიული ინფექციით დაავადდნენ, ასეთი რამე სავსებით შესაძლებელია“ – ამბობს ექსპერტი. მისი თქმით, ყველაზე მძიმე შემთხვევებია, როდესაც ერთდროულად რამდენიმე ტიპის ვირუსი ბავშვებს უფიქსირდებათ.
რამდენიმე, ინფექციით ერთდროულად ინფიცირებას ექიმები „სუპერინფექციას“ უწოდებენ. თუ ადამიანს შეენიშნება სუნთქვის პრობლემები, ტკივილი გულ-მკერდის არეში, გონების დახშულობა, კანის, ტუჩების ან ფრჩხილების ფერის ცვლილება, აუცილებელია სპეციალისტის სასწრაფო სამედიცინო ჩარევა.
ჯანდაცვის ექსპერტები ამბობენ, რომ ვირუსისგან თავდაცვის „პირველი ხაზი“ ისევ და ისევ ვაქცინაციაა. კორონავირუსის საწინააღმდეგო ვაქცინები ფართოდ არის გავრცელებული, მაგრამ რესპირატორული ვირუსების საწინააღმდეგო ვაქცინაცია არ არსებობს. „ვაქცინა არა მარტო ინფიცირების ალბათობის, არამედ დაავადების მძიმე ფორმის ალბათობას მნიშვნელოვნად ამცირებს.“ – ამბობს გალი.
კორონავირუსით ინფიცირების შემთხვევაში საერთო ჯამში 200 სხვადასხვა სიმპტომი არსებობს, რომლებიც, ძირითადად, იმ ადამიანებს შეენიშნებათ, რომლებიც ხანგრძლივი COVID-ით არიან დაავადებულები. მათგან ყველაზე ხშირად 20 სიმპტომი გვხვდება. ესენია მოთენთილობა, აჩქარებული პულსი, ასევე ნევროლოგიური პრობლემები და კუჭ-ნაწლავის სისტემის არასწორი ფუნქციონირება. იმისთვის, რომ ვირუსით ინფიცირების ალბათობა შევამციროთ, ყველასთვის ნაცნობი ღონისძიებების განხორციელებაა აუცილებელი – პირბადის ტარება, ხელების ხშირი დაბანა და დაავადების დროს სახლში ყოფნა.
რაც შეეხება რისკჯგუფებს, რომლებსაც ვირუსის მძიმე ფორმა შეიძლება განუვითარდეთ, მათი მკურნალობისას პრეპარატები ტამიფლუ (გრიპის შემთხვევაში) და პაკსლოვიდი (COVID-19-ის შემთხვევაში) გამოიყენება. ასევე სპეციალისტები ამბობენ, რომ დაავადების სწრაფი დამარცხების ერთ-ერთი უმთავრესი პირობაა მკურნალობის დროული და სათანადო მიღება.
Loading ...
