რა არის ცნობილი ასტეროიდზე, რომელიც დედამიწისკენ მოემართება?

ბოლო დროს, მეცნიერების ყურადღების ცენტრში ერთი ასტეროიდი მოხვდა, რომელიც დედამიწისკენ მოემართება. 2024 YR4 — ასე ეწოდება შენობის ზომის ასტეროიდს, რომელიც ამჟამად მზის უკანა მხარეს იმყოფება, მაგრამ დედამიწის და მთვარის მიმართულებით მოემართება.

თავდაპირველი პროგნოზით, დედამიწასთან ახლოს ასტეროიდი 2032 წლის დეკემბრისთვის გაივლის, რა დროსაც ჩვენს პლანეტასთან მისი შეჯახების ალბათობა 3.1% იყო. დედამიწასთან შეჯახება ამ დროისთვის გამოირიცხა, მაგრამ მთვარესთან შეჯახების ალბათობა 4.3%-მდე გაიზარდა.

თუკი ასტეროიდი დედამიწის კოსმოსურ თანამგზავრზე მართლაც ჩამოვარდება, ლურჯი პლანეტის მცხოვრებლების ეს ცხოვრებაში ერთხელ საყურებელი სანახაობა იქნება, რადგან ასეთი რამ დაახლოებით 5,000 წელიწადში ერთხელ ხდება. რაკიღა დედამიწასთან შეჯახება გამოირიცხა, ჩვენი პლანეტა პირდაპირ არ დაზიანდება, მაგრამ მთვარის ზედაპირის ნაწილები, შესაძლოა, დედამიწის მიმართულებით წამოვიდეს. ამასთან, თუკი იმ დროს მთვარეზე ასტრონავტები იქნებიან, რაც Artemis-ის მე-3 მისიის ფარგლებში რეალისტურია, ისინიც საფრთხის წინაშე აღმოჩნდებიან.

2024 YR4-ის ზუსტი ზომის დადგენა, ჯერჯერობით, უცნობია, რადგან ასტეროიდი დედამიწიდან შორს იმყოფება. ჯეიმს უების ტელესკოპის დახმარებით მიღებული დათვლებით, დედამიწისკენ მომავალი ასტეროიდის დიამეტრი დაახლოებით 60 მეტრია. გამოდის, რომ ასტეროიდი დიდია, მაგრამ ის არ არის გიგანტური, რასაც “პლანეტის მმუსვრელ ასტეროიდებს” უწოდებენ — ამ სიმბოლური სტატუსის მისაღებად ასტეროიდის რადიუსი სულ მცირე ერთი კილომეტრი უნდა იყოს. აი, სწორედ ამ ტიპის ასტეროიდი ჩამოვარდა დედამიწაზე 66 მილიონი წლის წინ, რამაც დინოზავრები გადააშენა.

www.bm.ge