რატომ ჩაიშალა დღეს გურიის რეგიონში ვაქცინაცია

” ფლაკონში არის ათი ადამიანის დოზა, თუ ათი ადამიანი არ შეგროვდა და აცრა ნაკლები რაოდენობის ადამიანს გავუკეთეთ, გამოვა, რომ ვაქცინის გამოუყენებელი ნაწილი უნდა გადავღვაროთ. შეიძლება ითქვას, რომ ეს პრეპარატი ფუფუნებაა და ზარალი არ იყოს, ვცდილობთ, რომ მაშინ გავაკეთოთ, როცა ათი მსურველი შეგროვდება. დღეს ჩაწერილი იყო დაახლოებით ცამეტი ადამიანი, შვიდი არ გამოცხადდა რატომღაც, თავი შეიკავეს. შესაბამისად, დღეს არ გავაკეთეთ ვაქცინაცია, რომ წამლის გადაღვრა არ დაგვჭირვებოდა”. – განაცხადა ოზურგეთის ”მედალფას” დირექტორმა დავით მდინარაძემ.

იგივე მოხდა ჩოხატაურშიც. ჩოხატაურში ვაქცინაციაზე ორი მედიკოსი დარეგისტრირებული იყო, ხოლო დანარჩენი ცხრა ვაქცინაციის სიაში იყო შეყვანილი, თუმცა კლინიკა ”მედალფას” დირექტორის ანტონ ხუნდაძის თქმით, დარეგისტრირებულმა ორმა მედიკოსმა ვაქცინაციაზე მოსვლა ვეღარ შეძლო.

”გვითხრეს, რომ ავად იყვნენ და ვაქცინის გაკეთებას ვერ შეძლებდნენ. ამიტომ ვაქცინაციას სამშაბათისთვის გადავიტანთ” – აღნიშნა ანტონ ხუნდაძემ.

რაც შეეხება ლანჩხუთს, დღეს ლანჩხუთში იმუნიზაციის დღე არ ყოფილა. ვაქცინაცია გეგმის მიხედვით ხვალ უნდა ჩატარებულიყო, მაგრამ ჩვენი ინფორმაციით, ლანჩხუთელი მედიკოსების ნაწილი აცხადებს, რომ ავად არის და ვაქცინაციაზე მისვლას ვერ შეძლებს. შესაბამისად, კორონავირუსის საწინააღმდეგო ვაქცინაცია ლანჩხუთში სამშაბათისთვის გადაიდო.