ოზურგეთის მუნიციპალიტეტის სოფელ კონჭკათში მკვლელობა მოხდა. 23 წლის მამაკაცმა მეზობელი მოკლა. შემთხვევა მეზობლის სახლში მოხდა. სოფელში გავრცელებული ინფორმაციის თანახმად, ბრალდებულმა მამაკაცს სახლში მიაკითხა, მაშინ როცა ოჯახი სადილობის პროცესში იყო და ყოველგვარი კონფლიქტური წინაპირობის გარეშე, დანით კისრის არეში ჭრილობა მიაყენა. 58 წლის მამაკაცი ადგილზე გარდაიცვალა.
მოკლულ მამაკაცს უკონფლიქტო, წესიერ და მშვიდ ადამიანად ახასიათებენ, რომელსაც პრობლემები არცერთ მეზობელთან არ ჰქონია. რაც შეეხება ბრალდებულს, გავრცელებული ინფორმაციით, ის ცხოვრების ჩაკეტილი წესით ხასიათდებოდა. ძირითადად, კომპიუტერული თამაშებით იყო დაკავებული და როგორც ამბობენ, მეზობლის მოკვლის დავალებაც აღნიშნული კომპიუტერული თამაშისგან მიიღო. საუბრობენ იმაზეც, რომ ბრალდებულს დავალებული ჰქონდა, ოჯახის რომელიმე წევრის მკვლელობაც.
სამართალდამცველებმა ჩატარებული საგამოძიებო მოქმედებების შედეგად, გ.ჩ. ბრალდებულის სახით ცხელ კვალზე დააკავეს.
დანაშაულის ჩადენის იარაღი – დანა ნივთმტკიცებადაა ამოღებული.
გამოძიება სისხლის სამართლის კოდექსის 108-ე მუხლით მიმდინარეობს, რაც 15-წლამდე ვადით თავისუფლების აღკვეთას ითვალისწინებს.
Loading ...