![](https://guria.tv/wp-content/uploads/2023/12/tbilisi-sacobi-game.jpg)
თბილისის მერი, კახა კალაძე ამბობს, რომ საცობები დედაქალაქის ერთ-ერთი გამოწვევაა, რომლის მიზეზიც “ავტომობილების გადაჭარბებული რაოდენობაა”. მან ჟურნალისტებს უთხრა, რომ პიკის საათში ქალაქის ქუჩებში 650 ათასი ავტომობილი მოძრაობს.
მისი თქმით, არსებულ პრობლემას გუშინ დაემატა ვაკე-საბურთალოს მიდამოებში 54 ავტოსაგზაო შემთხვევა.
“ერთადერთი გზა, რაც ჩვენ შესაძლებლობას მოგვცემს, რომ ამ მიმართულებით რაღაცები გამოვასწოროთ, ეს არის ის პოლიტიკა, რასაც დედაქალაქის მერია ატარებს – საზოგადოებრივი ტრანსპორტის განვითარება, ახალი საავტობუსო ზოლები, ავტობუსები”, – ამბობს კალაძე.
თბილისის მერი ამბობს, რომ ქალაქში არსებული საცობების მიუხედავად, გადაუდებელი დახმარების გაწევას პრობლემა არ ექმნება:
“მიუხედავად იმისა, რომ ქალაქში არის საცობები, მიუხედავად იმისა, რომ რთულია გადაადგილება, არც სასწრაფო დახმარების მანქანას და არც სახანძროს გადაადგილების თვალსაზრისით პრობლემა არ აქვს, იმიტომ, რომ საზოგადოებას იმის კულტურა აქვს, როდესაც სახანძრო მოდის და თუნდაც სასწრაფო დახმარების მანქანა, გაატარონ”.
გუშინ, 13 დეკემბერს დედაქალაქის არაერთ ქუჩაში საცობი იყო. მოქალაქეები ერთი ადგილიდან მეორე ადგილზე მოხვედრას გაცილებით დიდ დროს ანდომებდნენ. მერიაში აცხადებენ, რომ მუნიციპალიტეტის პოლიტიკაა შემცირდეს ავტომობილზე დამოკიდებულება – ამისთვის ქალაქში შემოჰყავთ 18-მეტრიანი ავტობუსები.
www.radiotavisupleba.ge