დღეს საქართველოს მასშტაბით საბავშვო ბაღებში სააღმზრდელო პროცესი განახლდა. ოზურგეთის 44 საბავშვო ბაღიდან აღსაზრდელების მიღება დღეს 14 ბაღმა ვერ შეძლო და ამის შესახებ სააღმზრდელო ცენტრმა განცხადება სოციალური ქსელით პროცესის დაწყების წინა საღამოს გაავრცელა.
აღნიშნულმა განცხადებამ მშობლების უკმაყოფილება გამოიწვია.
როგორც სასწავლო-სააღმზრდელო ცენტრის დირექტორი მაკა ჭყონია ამბობს, ცენტრი მუშაობს იმაზე, რომ პროცესი აღნიშნულ საბავშვო ბაღებში დროულად განახლდეს.
– ყველა ბაღში შეტანილია პროდუქტი, ჰიგიენური და სხვა ტიპის საშუალებები. ყველაფერი მზად იყო იმისთვის, რომ სააღმზრდელო პროცესი განახლებულიყო, მაგრამ ”სოკარის” რეგულაციებიდან გამომდინარე, იმ საბავშვო ბაღებში, რომლებიც მარაგდებიან ბუნებრივი აირით, ვერ მოხერხდა სასწავლო-სააღმზრდელო პროცესის დაწყება. ასეთი 12 ბაღია. რეგულაციების ერთ-ერთი მთავარი მოთხოვნაა, საბავშვო ბაღების სამზარეულოები იყოს ცალკე შენობაში ან უნდა დამონტაჟდეს ელექტრო გაზქურები. ოზურგეთის მერიამ გააფორმა ხელშეკრულება და მიმდინარეობს მოლაპარაკებები და სამუშაოები, ბაღებში სამი ფაზის შეყვანასთან დაკავშირებით. ასევე, გამოცხადებულია ტენდერი ელექტრო გაზქურების შესყიდვასთან დაკავშირებით.
ეს რეგულაციები ”სოკარმა” მოგაწოდათ დაგვიანებით თუ ოზურგეთის მერიამ ვერ მოახერხა ამ რეგულაციების დროულად შესრულება, რომ 4 ოქტომბრამდე ეს პრობლემა მოგვარებულიყო?
– საკმაოდ დიდ თანხებთან არის ეს ყველაფერი დაკავშირებული, საუბარია 44 საბავშვო ბაღში სამი ფაზის შეყვანააზე. ასევე, ამდენივე გაზქურის შესყიდვაზე, თუმცა რეგულაციების შესახებ ვიცოდით, დამონტაჟებული გვქონდა სენსორები უსაფრთხოების მიზნით, მაგრამ ამ ეტაპზე არ მოხდა ამ რეგულაციების გათვალისწინება.
კიდევ ორ საბავშვო ბაღში ვერ მოხერხდა სასწავლო პროცესის განახლება.
– ეს არის ნაგომრისა და ნასაკირალის საბავშვო ბაღები, სადაც ხანძარი იყო. მიმდინარეობს ფართის ძიების პროცესი და უახლოეს დღეებში გადაწყდება ეს პრობლემა. აქვე ვიტყვი, რომ უახლოეს დღეებში გავაკეთებთ განცხადებას საბავშვო ბაღებში პროცესის განახლების შესახებ, რაც სავარაუდოდ ხუთშაბათისთვის მოხდება. ვეცდებით, სანამ რეგულაციები შესრულდება, გათბობის ალტერნატიული საშუალებები მოვიძიოთ, რომ სააღმზრდელო პროცესს ხელი არ შეეშალოს.
შეგახსენებთ, რომ ნაგომრის საბავშვო ბაღის შენობა 31 ივლისს, ხოლო ნასაკირალის საბავშვობაღის შენობა 29 სექტემბერს დაიწვა. ორივე შემთხვევის გამომწვევი სავარაუდო მიზეზი მოძველებული ელექტროგაყვანილობა იყო.
Loading ...
