რატომ გაძვირდა საქართველოში შაურმა – კომპანიების განმარტება

საქართველოში ერთ-ერთი ყველაზე ცნობილი საკვები შაურმა გაძვირდა. ობიექტების უმრავლესობაში, ფასი საშუალოდ 1 ლარით გაიზარდა. კერძოდ, 9-ლარიანი პატარა შაურმა 10 ლარი, ხოლო 11-ლარიანი სტანდარტული 12 ლარი გახდა.

კომპანიები პროდუქტის გაძვირების მიზეზად ხარჯების ზრდას ასახელებენ. მათი თქმით, მოიმატა როგორც ნედლეულის ისე ტრანსპორტირების ღირებულებამ. ამასთან გაზრდილია, ადმინისტრაციული ხარჯიც.

„პირველ რიგში, უნდა აღვნიშნოთ, რომ კონკურენტებისგან განსხვავებით, ფასები ერთი წლის განმავლობაში არ გაგვიზრდია. „მარგეს“ პროდუქტზე ფასის მინიმალური ზრდა განაპირობა შემდეგმა ფაქტორებმა: აბსოლუტურად ყველა მომწოდებლისგან ფასები ერთი წლის განმავლობაში გაიზარდა 30%-ით. ორჯერ გაგვეზარდა ხორცის ტრანსპორტირების ხარჯები ბრაზილიიდან საქართველოში. ამასთან ერთად, გაგვეზარდა სამაცივრე ხარჯები, რადგან ორჯერ მეტი პროდუქტის შენახვა გვიწევს“,- აღნიშნეს კომპანიაში „მარგე“.