რატომ არის ეს კვირა ეპიდემიოლოგიურად გადამწყვეტი? – ჯანდაცვის სექტორი ინფიცირების ზრდას ელის

იმუნიზაციის ტექნიკურ მრჩეველთა ეროვნული ჯგუფის ხელმძღვანელის ივანე ჩხაიძის განცხადებით, ხვალინდელი დღე, 8 თებერვალი, ქვეყანის ეპიდემიოლოგიურ ისტორიაში გადამწყვეტი იქნება. მისი განმარტებით, თუ ხვალ, 26 ათასზე ნაკლები Covid-ინფიცირება დადასტურდა, შეგვიძლია ჩავთვალოთ, რომ მე–6 ტალღის პიკმა გადაიარა.  ჩხაიძის განმარტებით, სწორედ 26 ათასი შემთხვევა იყო საქართველოში დღიურად დაფიქსირებული ყველაზე მაღალი მაჩვენებელი და სწორებაც მასზე ხდება.

“იაშვილის სახელობის ბავშვთა ცენტრალური საავადმყოფოს” სამედიცინო დირექტორი მედიჰოლდინგ „კვირაში“ ჟურნალისტების მიერ დასმული კითხვის საპასუხოდ განმარტავს, რომ ინფიცირების ახალი რეკორდის დაფიქსირების რისკი „ომიკრონის“ ახალი ვარიანტის გამოჩენის გამო საკმაოდ დიდია.

„ქვეყანაში არსებული სტატისტიკური მონაცემების მიხედვით, ყოველთვის აქცენტს ვაკეთებთ სამშაბათზე, რადგან სამშაბათის მაჩვენებელი, როგორც წესი, მაქსიმალური ანუ პიკურია ხოლმე. დღემდე ყველაზე მაღალი ინფიცირების 26 000 შემთხვევა 2 თებერვალს დაგვიფიქსირდა და მას შემდეგ ეს რიცხვი იკლებს, ამიტომ ხვალინდელი დღე გარკვეულწილად გადამწყვეტია. თუ ხვალ ინფიცირების მაჩვენებელი 26 000-ზე ნაკლები იქნება, მაშინ უნდა ჩავთვალოთ, რომ საქართველოში მეექვსე ტალღის პიკმა გადაიარა და დიდი ალბათობით, შემდეგი დღეების მანძილზე შემთხვევები შემცირდება. თუმცა უფრო მოსალოდნელია, განსაკუთრებით „ომიკრონის“ მეორე ვარიანტის გამოჩენის ფონზე, რომ ხვალინდელი დღე იქნება კიდევ ერთი ახალი ანტირეკორდი ჩვენი ქვეყნის პანდემიის ისტორიაში და შემთხვევების რაოდენობა 26 000-ს გადააჭარბებს. ის მოლოდინი, რაც გვაქვს და რაც შეიძლება რეალისტური იყოს შემთხვევების 5-ჯერადი ზრდაა ადრე არსებულ მაქსიმუმთან შედარებით. ეს ერთი დღის განმავლობაში ინფიცირებული 30 000 ადამიანია. ეს ის გზაა, რომელიც ევროპის ძალიან ბევრმა ქვეყანამ გამოიარა და შესაძლებელია, საქართველოშიც ეს რიცხვი დაფიქსირდეს.

ინფიცირების პიკს იანვრის ბოლოს, თებერვლის პირველ კვირას ველოდით, ამიტომ ხვალინდელი დღე მართლაც გადამწყვეტია“, – განმარტა ჩხაიძემ.

www.bm.ge