''რას იზამს როზეტა სკამკოჩაიშვილი, თუ ნაციონალური მოძრაობის აგიტატორობას ხელმოწერილი დოკუმენტით დავუმტკიცებთ?'' – დავით მჟავანაძე

ოზურგეთის საკრებულოს სხდომაზე გუშინდელი დაპირისპირების შემდეგ საკრებულოს გენდერული საბჭოდან დავით მჟავანაძის გარიცხვაზე ალაპარაკდნენ. სხდომაზე  ”ქართული ოცნებისა” და ”ნაციონალური მოძრაობის” დეპუტატების დაპირისპირების მიზეზი საკრებულოს წევრი ქალების მიმართ ენმ დეპუტატის დავით მჟავანაძის შეფასებები გახდა. დავით მჟავანაძეს ”ქართული ოცნების” დეპუტატები საკრებულოს წევრის ქეთი ვასაძის ატესტატის ნამდვილობასთან დაკავშირებული სტატიის გაზიარებისა და კომენტარისთვის შეეკამათნენ, რაც საბოლოოდ შეხლა–შემოხლაში გადაიზარდა. დაპირისპირების დროს, დავით მჟავანაძემ ”ქართული ოცნების” დეპუტატს როზეტა სკამკოჩაიშვილს უთხრა, რომ ის ”ნაციონალური მოძრაობის” აგიტატორი იყო და სახლში შტაბი ჰქონდა გახსნილი. საბჭოდან შესაძლო გარიცხვის  მიზეზად დეპუტატები განმარტავენ, რომ მჟავანაძემ საკრებულოს წევრი ქალების მიმართ დისკრიმინაციული შეფასებები გააკეთა.

აღნიშნულთან დაკავშირებით დავით მჟავანაძე შემდეგ კომენტარს აკეთებს:

”ერთხელ მაინც რატომ არ გაუჩნდათ ამ ქალბატონებს პრეტენზია, როცა მაკო გომურს თვალი ამოთხარეს, როცა სტუდენტ გოგონებს დაერივნენ და რეზინის ტყვიები ესროლეს, მაშინ რატომ არ გააპროტესტეს ეს ყველაფერი? ახლა აგონიაში არიან და უნდათ თავიანთ მხარდამჭერებს აჩვენონ, თითქოს რაღაცას წარმოადგენენ. საინტერესოა, რას მედავებიან, თუ იმას აპროტესტებენ, რომ მედიაში გავრცელებული ინფორმაცია გავაზიარე და ჩემი გულისტკივილი გამოვთქვი, რომ ხელისუფლებაში უდიპლომობის გარდა უატესტატობის პრობლემაც ყოფილა, ეს მათი პრობლემაა. ხოლო თუ იმაში ხედავენ პრობლემას, რომ საკრებულოს წევრ ქალბატონზე როზეტა სკამკოჩაიშვილზე განვაცხადე,  რომ ”ნაციონალური მოძრაობის” მხარდამჭერი, კოორდინატორი და აგიტატორი იყო და მთელი ოჯახით იყვნენ ამაში ჩართულები, თუკი მე დოკუმენტებით და  მათივე ხელმოწერებით დავადასტურებ, ”ნაციონალური მოძრაობის” აგიტატორობაში როგორ იღებდნენ  ხელფასს, მაშინ რას იზამენ?  რაც შეეხება ქეთი ვასაძეს, საკრებულოს წევრის მიმართ არსებობს საჯარო ინტერესი და ეს განათლებას ეხება, შეკითხვებს პასუხი უნდა გაეცეს და ეს ლეგიტიმური კითხვები დისკრიმინაცია არ არის. მით უმეტეს, რომ ქეთი ვასაძე კულტურის მიმართულებით ა.ა.ი.პ.–ის  თანამშრომელია. ამ შემთხვევაშიც ჩემი სამიზნე ხელისუფლება იყო, წუხილი გამოვთქვი, რომ  პროფესიის არმქონე ადამიანები სათავეში არიან. 

რეალურად არსებობს  დოკუმენტი, რომელიც დაამტკიცებს, რომ როზეტა სკამკოჩაშვილი ”ნაციონალური მოძრაობის” აგიტატორი იყო?

არგუმენტების გარეშე და  ჰაერზე არასდროს  ვლაპარაკობ,  მოდი, დაველოდოთ, გენდერული საბჭო რა გადაწყვეტილებას მიიღებს და ამის მერე მე მივიღებ გადაწყვეტილებას, რა დოკუმენტი შეიძლება გასაჯაროვდეს და რა არა. თურმე ცილს ვწამებ და  შეუარცხოფას ვაყენებ. თუ შეურაცხყოფად იმას  თვლიან, რომ მე მათ აგიტატორობის პერიოდს  ვახსენებ, ბოდიში, მაგრამ ჩემთვის უფრო დიდი შეურაცხყოფაა, რომ თავის დროზე ასეთი ადამიანები იყვნენ ”ნაციონალური მოძრაობის” აგიტატორები. ურცხვად უარყოფენ, თითქოს ფაქტი არ ყოფილა, არადა ამის  დამადასტურებელი უამრავი  დოკუმენტაცია არსებობს. საინტერესოა, მერე რა პოზიცია ექნებათ.

აღნიშნულთან დაკავშირებით, როზეტა სკამკოჩაიშვილის კომენტარი შეგიძლიათ იხილოთ ამ ბმულზე.