ჩოხატაურის მუნიციპალიტეტის სოფელ გოგოლესუბანში 23 წლის ბიჭს გლოვობენ. ტრაგედია გუშინ მოხდა. ბრალდებული 27 წლის მამაკაცია, რომელიც ამავე სოფლის მკვიდრია.
მეზობლების განცხადებით, კონფლიქტი გუშინწინ მოკლულის დაბადების დღეზე დაიწყო. შემდეგ კი მეორე დღეს გაგრძელდა. როგორც მეზობელი ამბობს, ყვირილი არ გაუგონია, მაგრამ ხედავდა, რომ მამაკაცებს შორის სიტყვიერი კამათი მიმდინარეობდა.
‘მეზობლის სახლის ეზოში კამათობდნენ, მერე ავთო (გარდაცვლილი) ეზოდან გადმოვიდა და თქვა მე სახლში მივდივარო. ცოტა ხანში ისიც გადმოყვა და დაახლოებით 100 მეტრში ეს ამბავი მოხდა. დანა დაარტყა რამდენჯერმე. სასწრაფო არ გამოგვიძახებია, მეზობლის ბიჭებმა თავიანთი ავტომობილით წაიყვანეს კლინიკაში, მაგრამ ვეღარ გადაარჩინეს”– ამბობს მეზობელი.
ბრალდებულის ოჯახი აცხადებს, რომ მომხდარი მათთვის დიდი ტრაგედიაა.
”ქმარი ჭაში დამეხრჩვა, შვილი მომიკვდა, ახლა კიდევ ეს საშინელი ამბავი დაგვემართა.ადრე გვქონდა ოჯახი, ახლა ნაოჯახარი გვქვია. ჩოხატაურში მუშაობდა, მშენებლობაზე. დილით მიდიოდა და მოდიოდა. რა მოხდა არაფერი ვიცით. ნეტავ ეს მომკვდარიყო და ის საწყალი ბიჭი ცოცხალი ყოფილიყო. არაფერი აკლდა, რაც შეგვეძლო, ყველაფერი ჰქონდა, ასეთი საშინელება როგორ ჩაიდინა. ” – ბრალდებულის ბებია.
”დაზიანება ჰქონდა თავში, გიჟი იყო, ასე ჰქვია. ჯანმრთელობის პრობელემები ჰქონდა. ხან კაი ჭკუაზე იყო, ხან არეულ ჭკუაზე. ვერ ვუმკურნალეთ საშუალება არ გვაქვს, მეც I ჯგუფის ინვალიდი ვარ. ერთმანეთში არა მგონია რამე კონფლიქტი ჰქონოდათ. რამდენიმე თვის გამოსული იყო ციხიდან. ” – ბრალდებულის დედა.
ბრალდებული საპატიმროდან რამდენიმე თვის გამოსული იყო. როგორც ამბობენ ის სასჯელს სამართალდამცველზე თავდასხმისთვის იხდიდა. პოლიცია ბრალდებულს ამ დრომდე ეძებს. მომხდარზე საქმე საქართველოს სისხლის სამართლის კოდექსის 108-ე მუხლითაა აღძრული, რაც განზრახ მკვლელობას გულისხმობს.
Loading ...