ოზურგეთის მუნიციპალიტეტის კულტურის ცენტრმა სამსახურიდან რამდენიმე თანამშრომელი დაითხოვა. ესენია: მაია თანდილაშვილი, ხათუნა ჭელიძე, ლალა ნაკაიძე და რუსუდან მდინარაძე.
როგორც გათავისუფლებული თანამშრომლები ”გურიაTV”-თან საუბრობენ, მათი დათხოვნა რეორგანიზაციის შედეგად მოხდა.
”35 წელია ამ ორგანიზაციაში ვმუშაობ, სამართლებრივ ბრძოლას არ ვაპირებ. სხვა კომენტარის გაკეთება არ შემიძლია” – განაცხადა მაია თანდილაშვილმა.
მომხდარით გაოგნებულია კიდევ ერთი, უკვე ყოფილი თანამშრომელი, ლალა ნაკაიძე. ის ოზურგეთში გერმანული ენის ცნობილი პედაგოგია, პარალელურად კი უკვე ათ წელზე მეტია კულტურის ცენტრის თანამშრომელი იყო.
” რითი შეიძლება ადამიანს გული ატკინონ, ამას ფიქრობს ყველა. ძალიან დათრგუნული ვარ. ამბობენ, რომ რეორგანიზაციის შედეგად გაგვიშვეს, მაგრამ რა ვიცი, შეიძლება, რომ ამხელა ცენტრში რეორგანიზაცია მხოლოდ ოთხი ადამიანისთვის გაკეთდეს? ”ქართულ ოცნებას” ვუჭერდი მხარს, ”ნაციონალური მოძრაობა” არ მომწონდა, განა პიროვნულად ვერჩოდი ვინმეს, უბრალოდ მათი გაკეთებული საქმეები არ მომწონდა და ვაფასებ ”ქართული ოცნების” საქმეებს, ამიტომ პოლიტიკურ გადაწყვეტილებად ჩემს გათავისუფლებას ვერ აღვიქვამ. ალბათ ვინმეს არ ვაწყობდი, დისკომფორტი ჰქონდათ ჩემთან ურთიერთობაში და ჩემი მოშორება გადაწყვიტეს, სხვა რა შეიძლება ვთქვა, არ ვიცი.” – თქვა ”გურიაTV”-თან ლალა ნაკაიძემ.
რაც შეეხება კულტურის ცენტრს, ორგანიზაციაში ჩვენს ზარს არ უპასუხეს. მათ კომენტარს მიღებისთანვე შემოგთავაზებთ.
Loading ...