რამ გამოიწვია ოზურგეთის კლინიკა ”მედალფაში” აცრის მსურველთა რაოდენობის გაორმაგება

ოზურგეთის კლინიკა ”მედლაფაში” კორონავირუსის საწინააღმდეგო ვაქცინაციის მსურველთა რაოდენობა ბოლო დღეებში შესამჩნევად გაიზარდა. იმუნიზაციის დინამიკის გაზრდა, სავარაუდოდ, ხელისუფლების ახალმა კამპანიამ გამოიწვია, რომლის ფარგლებშიც ყველა პენსიონერი, რომელიც კორონავირუსის საწინააღმდეგო ვაქცინით აიცრება, პენსიასთან ერთად ჯილდოს სახით 200 ლარს მიიღებს.

აცრის მსურველთა რაოდენობის გაზრდას აღნიშნულ კამპანიას უკავშირებს კლინიკის დირექტორიც. დავით მდინარაძე ამბობს, რომ გუშინ და დღეს ვაქცინაციის მსურველთა რაოდენობა თითქმის გაორმაგდა.

”მას შემდეგ რაც სახელმწიფომ ერთგვარი წამახალისებელი კამპანია დაიწყო პენსიონერებისთვის და აცრის შემთხვევაში ისინი საჩუქრად 200 ლარს იღებენ, ამან გამოიწვია ამცრელების რაოდენობის გაზრდა. თუ ადრე ვაქცინაციის მიზნით კლინიკას დღეში 40-50 ადამიანი მიმართავდა, ეს ციფრი გაორმაგდა და ახლა დღეში 80-90 ადამიანი მოდის. ” – ამბობს ”გურიაTV”-თან დავით მდინარაძე.