რამდენი პროცენტით შემცირდა გურიაში სოფლად მცხოვრები ადამიანების რაოდენობა

საქართველოში აღწერიდან აღწერამდე სასოფლო დასახლებებში მცხოვრები ადამიანების რიცხოვნობა 6.3%-ით შემცირდა. ამაზე მიუთითებს სტატისტიკის ეროვნული სამსახურის მიერ 2024 წელს ჩატარებული მოსახლეობის აღწერის წინასწარი შედეგები. უფრო კონკრეტულად, თუ 2014 წელს ჩატარებული აღწერის მიხედვით სოფლად 1 591 181 ადამიანი ცხოვრობდა, 2024 წელს ეს რაოდენობა 1 490 900-მდე შემცირდა.

აღსანიშნავია, რომ აღწერიდან აღწერამდე სასოფლო დასახლებებში მცხოვრები ადამიანების რიცხოვნობა მხოლოდ თბილისში, მცხეთა-მთიანეთსა და ქვემო ქართლში გაიზარდა, დანარჩენ 8 მუნიციპალიტეტში კი შემცირდა.

სასოფლო დასახლებებში მცხოვრები მოსახლეობის რაოდენობა 2024 წლის და 2014 წლის საყოველთაო აღწერისას:

• თბილისი – 45 000 ათასი ადამიანი (2014 წელს – 30 340, ზრდა 48%)
• აჭარა – 136 200 ადამიანი (2014 წელს – 149 179, კლება 8.7%)
• გურია – 70 000 ადამიანი (2014 წელს – 81 446, კლება 14%)
• იმერეთი – 235 800 ადამიანი (2014 წელს – 275 396, კლება 14.4%)
• კახეთი – 239 400 ადამიანი (2014 წელს – 247 057, კლება 3%)
• მცხეთა-მთიანეთი – 76 200 ადამიანი (2014 წელს – 73 314, ზრდა 4%)
• რაჭა-ლეჩხუმი ქვემო სვანეთი 22 100 ადამიანი (2014 წელს – 25 119, კლება 12%)
• სამეგრელო ზემო-სვანეთი 168 800 ადამიანი (2014 წელს – 201 370, კლება 16%)
• სამცხე-ჯავახეთი – 101 800 ადამიანი (2014 წელს – 105 841, კლება 3.8%)
• ქვემო ქართლი – 251 700 ადამიანი (2014 წელს – 243 251, ზრდა 3.4%)
• შიდა ქართლი – 143 900 ადამიანი (2014 წელს – 158 171, კლება 9%)

რაც შეეხება სასოფლო დასახლებების რაოდენობას, საქსტატს ამასთან დაკავშირებით 2024 წლის აღწერის შედეგები ჯერჯერობით არ გამოუქვეყნებია. 2014 წლის აღწერის შედეგად კი საქართველოში სულ 3 633 სასოფლო დასახლება იყო, აქედან 223-ში არავინ არ ცხოვრობდა, ანუ 2014 წელს გაუკაცრიელებული სოფლების წილი 6.1%-ს შეადგენდა. 2002 წლის აღწერის შედეგად კი 3 668 სოფლიდან 162-ი, ანუ 4.4% მთლიანად დაცლილი იყო. იმავე 2002 აღწერის შედეგად სოფლად 2 086 700 ადამიანი ცხოვრობდა.

შეგახსენებთ, რომ საქართველოს 2024 წლის მოსახლეობისა და სასოფლო-სამეურნეო აღწერა ჩატარდა 2024 წლის 14 ნოემბრიდან 31 დეკემბრის პერიოდში. აღწერამ მოიცვა ქვეყნის მთელი ტერიტორია, ოკუპირებული ტერიტორიების გარდა. ამასთან, საერთაშორისო მეთოდოლოგიის მიხედვით, აღწერას დაექვემდებარა ქვეყანაში მუდმივად მცხოვრები საქართველოს ყველა მოქალაქე, ასევე ქვეყნის ტერიტორიაზე მყოფი უცხო ქვეყნის მოქალაქეები და მოქალაქეობის არმქონე პირები.

ამასთან, წინასწარი მონაცემებით, 2024 წლის მდგომარეობით, საქართველოს მოსახლეობის რიცხოვნობამ 3 914 000 კაცი შეადგინა, რაც წინა აღწერის, 2014 წლის შედეგებთან შედარებით, 185 ათას ადამიანით მეტია. 10 წლის წინ საქართველოში 3 729 635 კაცი ცხოვრობდა.