სასტუმრო “პარაგრაფ შეკვეთილმა” 2021 წლის ფინანსური ანგარიში გამოაქვეყნა. ანგარიშის მიხედვით, სასტუმროს შემოსავალი გასულ წელს 2.2-ჯერ გაიზარდა და მან 35 მილიონ ლარს მიაღწია. ანგარიშგების თანახმად, “პარაგრაფ შეკვეთილმა” 2021 წელი 1.8 მილიონი ლარის მოგებით დაასრულა, მაშინ როდესაც 2020 წელს კომპანია 8.2-მილიონიან ზარალზე იყო.
“პარაგრაფ შეკვეთილი” 2020 წლიდან ბიძინა ივანიშვილის საქველმოქმედო ფონდ “ქართუს” საკუთრებაშია. ფინანსური ანგარიშის თანახმად, ამჟამად სასტუმროს აქტივების ღირებულება 58 მილიონ ლარს შეადგენს, ამასთან კომპანიას გააჩნია დაგროვილი ზარალი 205 მილიონი ლარის ოდენობით.
ფინანსური ანგარიშის მიხედვით, გასულ წელს კომპანიის შემოსავალი ასე ნაწილდებოდა:
• ამონაგები სასტუმროს ნომრებიდან – 20.4 მილიონი ლარი;
• ამონაგები საკვების გაყიდვიდან – 10.6 მილიონი ლარი;
• ამონაგები სასმელების გაყიდვიდან – 1.9 მილიონი ლარი;
• ამონაგები გამაჯანსაღებელი კლუბიდან – 1.7 მილიონი ლარი;
• ამონაგები სხვა დეპარტამენტებიდან და სხვა შემოსავალი – 0.4 მილიონი ლარი.
აუდიტირებული ფინანსური ანგარიშის მიხედვით, კომპანიამ გასულ წელს 7.1 მილიონის ადმინისტრაციული ხარჯები გასწია, ხოლო თავად სასტუმროს მიერ მიწოდებული სერვისების თვითღირებულება 23.9 მილიონი ლარი იყო.
“პარაგრაფ შეკვეთილი” არის ხუთვარსკვლავიანი სასტუმრო, რომელიც 220 ნომერს აერთიანებს. ის “მარიოტის” ქსელის Autograph Collection-ის ბრენდით ოპერირებს.
“5 ვარსკვლავიან სასტუმროს აქვს შესანიშნავი ხედები შავი ზღვის სანაპიროზე, 400 მ 2 აკვარიუმი ზღვის იშვიათი ბინადრებით, 115 მეტრის სიგრძის ზღვაში შეჭრილი აუზი ზღვის გაფილტრული წლით, შიდა საცურაო აუზი, ზამთრის დახურული ბაღი ეგზოტიკური მცენარეებით, კაფეები, ბარები, 7 თემატური რესტორანი, სპა და მაგნიტური ქვიშების საპროცედურო. ასევე აქვს საბავშვო კლუბი, გიგანტური ტოპოგანი, ჩოგბურთის მოედანი, სპორტული მოედნები და კინო თეატრი. სასტუმრო აერთიანებს საინტერესო თანამედროვე დიზაინს, უნიკალურ და ექსტრავაგანტულ თვისებებს და უმაღლესი სტანდარტების შესაბამის მომსახურებას,”- ნათქვამია კომპანიის მმართველობით ანგარიშში.
www.bm.ge
Loading ...