რამდენიმე კომპანიასა და ფიზიკურ პირს ქონებას იძულებით ჩამოართმევენ

ლაჯანური-წყალტუბოს“ 500 კვ-იანი საჰაერო ელექტროგადამცემი ხაზის მშენებლობის გამო, რამდენიმე კომპანიასა და ფიზიკურ პირს ქონებას იძულებით ჩამოართმევენ.

კერძოდ, საქართველოს ეკონომიკისა და მდგრადი განვითარების მინისტრის ბრძანებაში ნათქვამია, რომ სამეგრელო-ზემო სვანეთის და რაჭა-ლეჩხუმი-ქვემო სვანეთის რეგიონებში არსებული და დაგეგმილი ჰიდროელექტროსადგურების მიერ გამომუშავებული ელექტროენერგიის საერთო ქსელში ინტეგრაციის მიზნით, სს „საქართველოს სახელმწიფო ელექტროსისტემა“ გეგმავს ელექტროგადამცემი ქსელის მშენებლობას, რაც აუცილებელი საზოგადოებრივი საჭიროების მქონე პროექტად უნდა ჩაითვალოს. აქედან გამომდინარე, „საქართველოს სახელმწიფო ელექტროსისტემას“ უნდა მიენიჭოს ექსპროპრიაციის უფლება პროექტის არეალში მოქცეულ უძრავ ქონებაზე.

შესაბამისად, ეკონომიკის სამინისტროს გადაწყვეტილებით, პროექტის საჭიროებიდან გამომდინარე, ექსპროპრიაციას (საკუთრების ძალადობრივი ჩამორთმევა სახელმწიფოს მიერ ანაზღაურებით) დაექვემდებარა:

ვის ჩამოერთმევა ქონება იძულებით?

• წყალტუბოს მუნიციპალიტეტში სოფელ გუმბრაში მდებარე 5303 კვ.მ. არასასოფლო-სამეურნეო დანიშნულების მიწის ნაკვეთი, რომლის მესაკუთრეა გოჩა შარაბიძე. დადგენილია, რომ პროექტით გათვალისწინებული სამშენებლო სამუშაოების განხორციელების არეალში ექცევა ნაწილი – 87 კვ.მ მიწის ნაკვეთი;
• წყალტუბოს მუნიციპალიტეტში, სოფელ გუმბრაში მდებარე სასოფლო-სამეურნეო დანიშნულების მიწის ნაკვეთი, რომლის მესაკუთრეა შპს „აკა“. დადგენილია, რომ პროექტით გათვალისწინებული სამშენებლო სამუშაოების განხორციელების არეალში ექცევა ნაწილი – 433 კვ.მ მიწის ნაკვეთი;
• ცაგერის მუნიციპალიტეტში, სოფელ ზოგიში მდებარე 1443 კვ.მ სასოფლო-სამეურნეო მიწის ნაკვეთი, რომლის მესაკუთრეა ნუგზარ ხვადაგიანი. დადგენილია, რომ პროექტით გათვალისწინებული სამშენებლო სამუშაოების განხორციელების არეალში ექცევა ნაწილი – 5 კვ.მ მიწის ნაკვეთი;
• წყალტუბოს მუნიციპალიტეტში, სოფელ გუმბრაში მდებარე 16700 კვ.მ სასოფლო-სამეურნეო მიწის ნაკვეთი, რომლის მესაკუთრეა შპს “მაქს-კაპიტალი“. დადგენილია, რომ პროექტით გათვალისწინებული სამშენებლო სამუშაოების განხორციელების არეალში ექცევა მიწის ნაკვეთის ნაწილი – 315 კვ.მ მიწის ნაკვეთი;
• წყალტუბოს მუნიციპალიტეტში, სოფელ გუმბრაში მდებარე 48097 კვ.მ სასოფლო-სამეურნეო დანიშნულების მიწის ნაკვეთი, რომლის მესაკუთრეა შპს “მაქს-კაპიტალი”. დადგენილია, რომ პროექტით გათვალისწინებული სამშენებლო სამუშაოების განხორციელების არეალში ექცევა ნაწილი -164 კვ.მ მიწის ნაკვეთი.

“ვინაიდან, დეპარტამენტის მიერ ვერ ხერხდება უძრავი ქონების გამოსყიდვის თაობაზე კერძო მესაკუთრესთან შეთანხმების მიღწევა, არსებობს ექსპროპრიაციის გზით საკუთრების უფლების ჩამორთმევის საჭიროება“, – ნათქვამია ბრძანებაში.

ამასთან, როგორც დოკუმენტშია აღნიშნული, გადაწყვეტილება შეიძლება გასაჩივრდეს მისი გამოქვეყნების ან ოფიციალური წესით გაცნობის დღიდან ერთი თვის ვადაში, თბილისის საქალაქო სასამართლოს ადმინისტრაციულ საქმეთა კოლეგიაში.

www.bpn.ge