რაზე ისაუბრეს ტრამპმა და პუტინმა – რუსეთის პრეზიდენტის თანაშემწე სატელეფონო საუბრის დეტალებზე საუბრობს

პუტინისა და ტრამპის სატელეფონო საუბარი ერთ საათსა და 15 წუთს გაგრძელდა. ამის შესახებ რუსეთის პრეზიდენტის თანაშემწემ, იური უშაკოვმა განაცხადა.

როგორც უშაკოვმა აღნიშნა, რუსეთისა და აშშ-ის ლიდერებს, ვლადიმერ პუტინსა და დონალდ ტრამპს შორის სატელეფონო საუბარი ამერიკული მხარის ინიციატივით შედგა.

უშაკოვის თქმით, პუტინსა და ტრამპს შორის საუბარი მეგობრული, კეთილგანწყობილი და საქმიანი იყო.

„ლოგიკურია, რომ პრეზიდენტებმა საუბარი, რომელიც ერთ საათსა და 15 წუთს გაგრძელდა, შობისა და ახალი წლის დღესასწაულებთან დაკავშირებული თბილი მილოცვების გაცვლით დაიწყეს და, ბუნებრივია, ორივე ქვეყნის ხალხს ბედნიერება უსურვეს. მთელი შემდგომი საუბარი თანაბრად მეგობრული, კეთილგანწყობილი და საქმიანი იყო, რომელიც ორიენტირებული იყო უკრაინის კონფლიქტის მშვიდობიანი და მდგრადი მოგვარებისკენ“, – განაცხადა უშაკოვმა.

მისივე თქმით, ტრამპმა ყურადღებით მოისმინა მოსკოვის შეფასება შეთანხმების პერსპექტივებთან დაკავშირებით.

„დონალდ ტრამპმა ყურადღებით მოისმინა რუსეთის შეფასება შეთანხმების მიღწევის რეალურ პერსპექტივებთან დაკავშირებით“, – განაცხადა უშაკოვმა.

უშაკოვმა აღნიშნა, რომ პუტინსა და ტრამპს, ძირითადად, მსგავსი შეხედულებები აქვთ, რომ დროებითი ცეცხლის შეწყვეტა მხოლოდ გაახანგრძლივებს უკრაინაში მიმდინარე კონფლიქტს. მისივე თქმით, ტრამპი და პუტინი კიევისა და ევროკავშირის სამშვიდობო წინადადებებს კონფლიქტის გაჭიანურების მცდელობად მიიჩნევენ.

„მთავარი არის, რომ რუსეთისა და აშშ-ის პრეზიდენტებს ძირითადად მსგავსი შეხედულებები აქვთ იმ ფაქტთან დაკავშირებით, რომ უკრაინელებისა და ევროპელების მიერ შემოთავაზებული დროებითი ცეცხლის შეწყვეტა, რეფერენდუმისთვის მომზადების ან სხვა საბაბით, მხოლოდ გაახანგრძლივებს კონფლიქტს და საომარი მოქმედებების განახლების რისკს შექმნის“, – აღნიშნა უშაკოვმა.

უშაკოვმა ასევე განაცხადა, რომ ტრამპმა ომის რაც შეიძლება სწრაფად დასრულების აუცილებლობაზე ისაუბრა. მისივე თქმით, სატელეფონო საუბრისას, აშშ-ის პრეზიდენტმა ისაუბრა აშშ-რუსეთის ეკონომიკური თანამშრომლობის შთამბეჭდავ პერსპექტივებზე, იმ შემთხვევაში, თუ უკრაინაში კონფლიქტი დასრულდება.

მისივე თქმით, ტრამპმა აღიარა, რომ უკრაინის კონფლიქტი მისთვის ყველაზე რთული იყო. რუსეთის პრეზიდენტის თანაშემწემ აღნიშნა, რომ უკრაინაში საომარი მოქმედებების დასრულება შესაძლებელია, თუ კიევი დონბასთან დაკავშირებით რუსეთ-ამერიკის შეთანხმებების შესაბამისად გაბედულ გადაწყვეტილებას მიიღებს.

უშაკოვის თქმით, რუსეთისა და აშშ-ის პრეზიდენტები შეთანხმდნენ, რომ ტრამპისა და ზელენსკის შეხვედრის შემდეგ კვლავ გამართავენ სატელეფონო საუბარს.

„ვლადიმერ პუტინი და დონალდ ტრამპი შეთანხმდნენ, რომ აშშ-ის პრეზიდენტისა და უკრაინის გუნდს შორის დღეს საღამოს მარ-ა-ლაგოში გამართული შეხვედრის შემდეგ დაუყოვნებლივ კვლავ ისაუბრებენ“, – განაცხადა უშაკოვმა.

უშაკოვმა ასევე აღნიშნა: „დღევანდელი საუბრის დროს რუსეთის პრეზიდენტი დათანხმდა ამერიკული მხარის წინადადებას, გააგრძელოს ძალისხმევა უკრაინის გარშემო არსებული სიტუაციის მოსაგვარებლად, სპეციალურად შექმნილი ორი სამუშაო ჯგუფის შესახებ. ერთი ჯგუფი უსაფრთხოების საკითხების სხვადასხვა ასპექტს განიხილავს, ხოლო მეორე – ეკონომიკურ საკითხებს. ამ სამუშაო ჯგუფების შექმნის პირობები უახლოეს მომავალში, სავარაუდოდ, იანვრის დასაწყისში, კიდევ უფრო დაზუსტდება“.