რადიაციამ არ იცის, სად მდებარეობს რუსეთი, არც თქვენი ქვეყნის საზღვრებს ცნობს – ზელენსკი რუს ხალხს მიმართავს

უკრაინის პრეზიდენტი ვოლოდიმირ ზელენსკი ზაპოროჟიეს ატომურ ელექტროსადგურზე მომხდარ თავდასხმასთან დაკავშირებით, რუსეთის მოსახლეობას მიმართავს.

ის ამბობს, რომ ჩერნობილის კატასტროფის დავიწყება დაუშვებელია და რომ ატომურ ელექტროსადგურებზე თავდასხმა რუსეთისთვისაც საზიანო იქნება.

ზელენსკი რუსეთის მოსახლეობას მოუწოდებს, თავიანთი ხელისუფლების ქმედებები გააპროტესტონ.

“გადავლახეთ ღამე, რომელსაც შეეძლო, ჩვენი ერის, უკრაინისა და ევროპის ისტორია გაეჩერებინა. რუსი სამხედროები ზაპოროჟიეს ატომურ ენერგო სადგურს უტევდნენ. ევროპის უდიდეს ატომურ სადგურს. ის ჩერნობილზე 6-ჯერ უფრო დიდია. რუსმა ტანკისტებმა კარგად იცოდნენ, რასაც ესროდნენ. ეს წარმოუდგენელი ტერორია. უკრაინაში 15 ატომური ბლოკია. რუს სამხედროებს კი მეხსიერება სრულიად დაქვეითებული აქვს და ჩერნობილის მსოფლიო ტრაგედია არ ახსოვთ.

რუსებო, მინდა მოგმართოთ, როგორ შეიძლება ეს არ გვახსოვდეს ჩერნობილი, განა ერთად არ ვებრძოდით მისი აფეთქების შედეგებს?! კარგად უნდა გახსოვდეთ აფეთქების შედეგად მიმოფანტული ცხედრები და ინფრასტრუქტურა! კარგად უნდა გახსოვდეთ აფეთქების დროს არსებული გამოსხივება და ხალხის ევაკუაცია! ამის დავიწყება როგორ შეიძლება, მაგრამ თუ გახსოვთ მაშინ არ გაჩუმდეთ. გამოდით ქუჩებში და თქვენს მთავრობას უთხარით რომ რადიაციული გამოსხივების გარეშე ცხოვრება გინდათ. რადიაციამ არ იცის, რუსეთი სად მდებარეობს. არც თქვენი ქვეყნის საზღვრებს ცნობს”, – მიმართა ვოლოდიმირ ზელენსკიმ რუს ხალხს.

მანვე აღნიშნა, რომ შექმნილ ვითარებაში აუცილებელია, დაუყოვნებლივ დაიკეტოს უკრაინის ცა.

“მთელი ღამის განმავლობაში მსოფლიო ლიდერებს და პარტნიორებს ვესაუბრებოდი. ისინი შოკირებულები არიან. ატომურ ენერგო სადგურზე მიტანილი იერიშის გამო, დიდი ბრიტანეთის გაეროს უშიშროების საბჭოს საგანგებო სხდომას ითხოვს. ატომური ტერორისტი ქვეყანას ახალი სანქციები დაუყოვნებლივ უნდა დაუწესდეს. უკრაინის ცა დაუყოვნებლივ უნდა დაიკეტოს. მხოლოდ ამას შეუძლია უზრუნველყოს იმის გარანტიები, რომ რუსეთი ატომურ ენერგო სადგურზე რაკეტებით იერიშს არ მიიტანს”, – ამბობს ზელენსკი.

ამასთან, ის მადლობა უხდის სამხედროებს, რომლებიც ატომურ ელექტროსადგურს იცავდნენ და მეხანძრეებს, რომლებმაც ცეცხლის ჩაქრობა მოახერხეს.

“მადლობელი ვარ ყველა ჯარისკაცის და გმირის რომელიც სადგურს იცავდა და მტრის შეჩერებას ცდილობდა, ადამიანებს რომლებმაც შენობაში გაჩენილი ცეცხლი ჩააქრეს. ენერგოდარის მცხოვრებლებმა კარგად იციან ამ საფრთხის შესახებ და მათზე ბევრია დამოკიდებული. განდევნეთ ოკუპანტები. დაანახეთ რომ უკრაინა ატომური ფერფლის ქვეყანა არაა. ძვირფასო უკრაინელებო, მტერმა ჩვენი ქვეყნის ტერიტორიაზე თავისი ჯარის დიდი ნაწილი შემოიყვანა”, – თქვა ვოლოდიმირ ზელენსკიმ.