პრეზიდენტი: პანდემიის მიუხედავად ცესკომ სამაგალითო და დემოკრატიული არჩევნები ჩაატარა

საქართველოს პრეზიდენტი სალომე ზურაბიშვილი ცენტრალური საარჩევნო კომისიის თავმჯდომარეს თამარ ჟვანიას შეხვდა. 

პრეზიდენტის საზოგადოებასთან ურთიერთობის სამსახურის ცნობით, თამარ ჟვანიამ სალომე ზურაბიშვილს 2020 წლის საპარლამენტო არჩევნების შესახებ დეტალური ინფორმაცია მიაწოდა.

“პრეზიდენტმა, თავის მხრივ, თამარ ჟვანიასა და მთლიანად საარჩევნო ადმინისტრაციას კიდევ ერთხელ დაუდასტურა პატივისცემა და გამოხატა მადლიერება, იმისთვის, რომ მათ შეძლეს პანდემიის მძიმე პირობების და გამოწვევების მიუხედავად ორგანიზება გაეწიათ სამაგალითო და დემოკრატიული არჩევნებისთვის”. – წერია განცხადებაში.

ამასთან ერთად, პრესსამსახურის ინფორმაციით, შეხვედრაზე პრეზიდენტმა ხაზი გაუსვა, რომ “დემოკრატიული ქვეყნისთვის ერთ-ერთ მთავარ მიუკერძოებელ ინსტიტუტზე, საარჩევნო პროცესის ქვაკუთხედზე – საარჩევნო ადმინისტრაციაზე და მის ქალ თავმჯდომარეზე ზეწოლა, მუქარა და შეურაცხყოფა მიუღებელია”.