თურქეთის პრეზიდენტმა რეჯეპ ტაიპ ერდოანმა განაცხადა, რომ ევროკავშირმა უარი უნდა თქვას მოძველებულ პოლიტიკაზე და თურქეთთან ახლავე უნდა განაახლოს მოლაპარაკებები გაწევრების საკითხზე.
თურქეთი 1999 წლიდან ევროკავშირის წევრობის კანდიდატი ქვეყანაა. სტატუსის მიღებიდან ექვს წელიწადში დაწყებული მოლაპარაკებები გაწევრების საკითხზე, 2016 წელს შეჩერდა თურქეთში ადამიანის უფლებებისა და დემოკრატიის ხელყოფით გამოწვეული კრიტიკისა და მხარეებს შორის პოლიტიკური უთანხმოების გამო. თურქეთი არ აღიარებს კვიპროსის რესპუბლიკას, რომელიც 2004 წლიდან ევროკავშირის წევრია.
პრეზიდენტი ერდოანი 21 ივლისს იმყოფებოდა გაეროს მიერ არაღიარებულ „ჩრდილოეთ კვიპროსის თურქულ რესპუბლიკაში“. როგორც სააგენტო Anadolu წერს, ანკარისკენ მიმავალმა ერდოანმა თვითმფრინავში ჟურნალისტებს განუცხადა, რომ კვიპროსის პრობლემის მოგვარების გასაღები კუნძულზე ორი სახელმწიფოს შექმნაა და ამ საკითხში თურქეთი კომპრომისს გამორიცხავს.
ევროკავშირთან უვიზო მიმოსვლა – გზა “მნიშვნელოვანი მიღწევიდან” “დიპ სტეიტის ბოლო კოზირამდე”
სააგენტო Anadolu-ს და თურქული საინფორმაციო ტელეარხის, TRT Haber-ის ინფორმაციით, ერდოანმა ჟურნალისტებს ისიც განუცხადა, რომ აუცილებელია ევროკავშირში თურქეთის გასაწევრიანებლად მოლაპარაკებების სწრაფად განახლება.
თურქეთის პრეზიდენტის თქმით, იმედია, ევროკავშირი აცნობიერებს, რომ გაურკვეველი პოზიციის საფუძველზე ურთიერთობების განვითარება შეუძლებელია. ერდოანის თანახმად, ევროპასა და მის გარშემო განვითარებული მოვლენები და ევროკავშირის შიგნით არსებული უთანხმოება ცხადყოფს, რომ ევროკავშირს სჭირდება ისეთი დინამიკური და გადაწყვეტილებებზე ორიენტირებული წევრი, როგორიც თურქეთია.
ერდოანის განცხადებით, მსოფლიო შეიცვალა, ევროპაც იცვლება და ევროკავშირი უნდა გათავისუფლდეს მოძველებული პოლიტიკური შეხედულებებისგან, რაც მისთვის ახალ ერას გახსნის. თურქეთის პრეზიდენტი მიიჩნევს, რომ ევროკავშირმა სასწრაფოდ უნდა მოხსნას თურქეთისთვის დაწესებული პოლიტიკური ბარიერები, უარი უნდა თქვას ორმაგ მიდგომებზე და მხარი დაუჭიროს სამართლიან და თანაბარუფლებიან ურთიერთობებს. ერდოანის განცხადებით, თურქეთი მზად არის ევროკავშირის სრულფასოვანი წევრობისთვის.
Loading ...